Soltústik Qazaqstan oblysynda mas er adam qyzmettik kólikte ýchaskelik ınspektorǵa pyshaqpen shabýyl jasady. Oqıǵa shilde aıynyń sońynda Qyzyljar aýdanynda, Lebedkı men Nalobıno aýyldary arasynda bolǵan, dep habarlaıdy infohub.kz saıty.
Málimetterge sáıkes, polıseı qoǵamdyq orynda mas kúıinde júrgen er adamdy medısınalyq kýálandyrýǵa aparyp bara jatqan. Jol ústinde quqyq buzýshy kenetten pyshaq alyp, ýchaskelikke shabýyl jasaǵan.
Polıseı kesilgen jaraqat alǵanymen, shabýyldaýshynyń qolynan pyshaqty julyp alyp, kólikti toqtata alǵan.
«Ýchaskelik polısıa ınspektory mas quqyq buzýshyny polısıa bólimine jetkizý kezinde kesilgen jaraqat aldy, ol qyzmettik kólikte polıseıge shabýyl jasaǵan. Osy fakti boıynsha qylmystyq is qozǵaldy. Kúdikti ustalyp, ýaqytsha ustaý ızolátoryna qamaldy», — dep habarlady Soltústik Qazaqstan oblysy polısıa departamentiniń baspasóz qyzmeti.
Qylmystyq is Qylmystyq kodekstiń 380-babynyń 5-bóligi boıynsha — bılik ókiline qatysty qaýip tóndirý nemese zorlyq áreketteri boıynsha qozǵaldy. Qyzmettik mindetin atqarý kezinde polıseıdiń ómirine nemese densaýlyǵyna qaýipti zorlyq qoldanǵany úshin 7 jyldan 12 jylǵa deıin bas bostandyǵynan aıyrý jazasy qarastyrylǵan.
Polısıada qajetti medısınalyq kómek alǵannan keıin jáne qalpyna kelgen soń ýchaskelik ınspektor qyzmetine qaıta oralǵanyn qosty.
Buǵan deıin «Kýrsıv» Almatyda «Atakent» kórme kesheniniń janynda balalar tobyna jasalǵan shabýylǵa qatysty polısıa tergeý bastaǵanyn jazǵan bolatyn. Zardap shekkenderdiń biriniń anasynyń aıtýynsha, er adam 10 jasar uldyń betinen uryp, balalardy jazalaımyn dep qorqytqan. Kúdikti ustalyp, polısıaǵa jetkizildi, oqıǵanyń mán-jaıy anyqtalyp jatyr.