Chehıalyq Skoda markasy Karoq krosoveriniń ekinshi býynyn daıyndap jatyr. Jýyrda ǵana kompanıa bul modelden bas tartyp, ornyna Elroq elektromobılin shyǵarýdy josparlaǵan edi. Endi oıynan qaıtqan óndirýshi jańa krosoverge alǵash ret qýaty 100 km-den asatyn elektr júrisi bar zarádtalatyn gıbrıd qondyrǵysyn usynýy múmkin, dep habarlaıdy infohub.kz saıty.
Alǵashqy Karoq 2017 jyly paıda bolǵan. Alaıda elektrlendirý josparlaryna baılanysty kompanıa oǵan tikeleı murager jasaýdy kózdegen joq. Model qataryndaǵy ornyn elektrlik Elroq alýy tıis bolatyn.
Degenmen qazir Skoda basshysy Klaýs Sellmer ekinshi býyn Karoq-qa ruqsat berdi. Jańa model Volkswagen Group MQB platformasyn saqtaıdy. Premerasy 2027 nemese 2028 jyly kútilýde.
«Bul qazirgi Elroq-tan aıtarlyqtaı ózgeshelik bolady, biraq biz sol baǵa segmentine dóp túsýge tyrysamyz. Sonda siz aqshańyzǵa kóbirek qundylyq alasyz», – dedi Sellmer.
Qazir Karoq ishki janý qozǵaltqyshymen jáne jumsaq gıbrıd qondyrǵylarymen usynylady. Al kelesi býyn, Skoda basshysynyń sózinshe, tolyqqandy zarádtalatyn gıbrıdke (PHEV) ıe bolýy múmkin.
Sellmerdiń aıtýynsha, jańa Karoq-tyń qýat qondyrǵylary jeti oryndy Kodiaq-ta qoldanylyp júrgenderge jaqyn bolady. Sondyqtan krosoverge elektr júrisi 100 km-den asatyn zarádtalatyn gıbrıd qondyrǵysy berilýi yqtımal.
Sonymen qatar jańa Karoq-tyń paıda bolýy tek gıbrıdterge suranyspen túsindirilmeıdi. Skoda Elroq Karoq-tyń ornyn tolyq jabady dep eseptegen, alaıda olaı bolmady. Onyń ústine Elroq óte tabysty bolyp shyqty – Sellmerdiń sózinshe, ol Eýropada satylymy boıynsha ekinshi elektromobıl.
Bul jańalyq Qazaqstan naryǵy úshin de qyzyqty. Qazir Skoda Karoq ishki janý qozǵaltqyshymen elimizde resmı túrde 14 mln teńgeden bastap satylady. Eger ekinshi býyn zarádtalatyn gıbrıdke ıe bolsa, ádettegi shaǵyn krosover formatyna elektr qýatymen júrý múmkindigi qosylady.
Bolashaq Karoq-tyń baǵasy men komplektasıalary týraly ázirge aıtý erte. Skoda tek modeldi daıyndap jatyr, naqty sıpattamalaryn óndirýshi áli jarıalaǵan joq.
Buǵan deıin Kýrsıv Avto Skoda Superb ýnıversaly Qazaqstanda satylymǵa shyǵýy múmkin ekenin jazǵan bolatyn.