Qazaqstandyq reper Skrıptonıt Killa Crossavah atty jańa saıd-jobasyn tanystyryp, «The Roof» tregine klıp shyǵardy. Jańa búrkenshik atpen ártis ádettegi dybystalýynan aıtarlyqtaı alystap, rep pen trepte tájirıbe jasap júr, dep habarlaıdy infohub.kz saıty.
Tamyz aıynyń sońynda Killa Crossavah «Medoed Mixtape Vol.1» atty debúttik mıksteıpin shyǵardy. Onda 15 trek bar: keıbireýleri dybystalýy jaǵynan Gruppa Skryptonite-ti eske túsirse, basqalary klasıkalyq repke kóbirek uqsaıdy.
«The Roof» klıpi ázirge jobanyń telegram-arnasynda ǵana qoljetimdi. Buǵan deıin dál osy búrkenshik atpen sol mıksteıptegi «Spliff» tregine beınebaıan shyqqan.
Skrıptonıttiń jankúıerleri onyń post astyndaǵy reaksıasyna qaraǵanda, jańa jobany jyly qabyldap, ártistiń kezekti eksperımentin baǵalady. Al áleýmettik jelilerde klıptiń úzindisi kezdeısoq tap bolǵan kóptegen qoldanýshy Killa Crossavah-tyń erekshe chıtkasy men dybystalýyn túsinbedi. Kópshilik aýdıtorıa úshin trek tym beıtanys bolyp shyqty, sondyqtan joba, shamasy, Jalelovtyń shyǵarmashylyǵymen jaqsy tanys ári onyń stıline daıyn tyńdarmandarǵa arnalǵan.
Skrıptonıt (shyn esimi Ádil Jalelov) – Pavlodar oblysynan shyqqan qazaqstandyq reper jáne mýzykalyq prodúser, Musica36 leıbliniń negizin qalaýshy. Ártis tek jeke relızderimen ǵana emes, kóptegen mýzykalyq jobalarymen de tanymal. 2018 jyly ol shyǵarmashylyǵyn Skrıptonıt jáne Gruppa Skryptonite (soýl, fank jáne álternatıvti hıp-hop) dep ekige bóldi. Endi olarǵa Killa Crossavah qosyldy.
Buǵan deıin Kursiv LifeStyle Skrıptonıttiń Almaty men Astanada konsertteri bar álemdik týr jarıalaǵanyn jazǵan bolatyn.