Reper Snýp Dogg týraly «Snýp» atty ómirbaıandyq fılm 2027 jyly 6 tamyzda álemdik prokatqa shyǵady, dep habarlaıdy infohub.kz.
Deadline dereginshe, fılm «R» (eresekterge arnalǵan) reıtıńine ıe bolady. Bul Universal stýdıasy men ánshiniń ózine tıesili Death Row Pictures kompanıasynyń alǵashqy birlesken jobasy. Rejıser – «Tarzan. Ańyz», «Ketı Perrı: Meniń bir bóligim» jáne «Melodıa ıh mechty» fılmderimen tanymal Kreıg Brúer. Senarıdi Djo Robert Koýl jazǵan. Jas Snýp Doggty «Syrtqy jaǵalaýlar» serıalynan belgili Djonatan Devıss somdaıdy. Prodúserler tobyna Snýp Doggtyń ózi, Death Row Pictures basshysy Sara Ramaker jáne buryn Emınem týraly «Segizinshi mılá» fılminiń prodúseri bolǵan Braıan Greızer kirgen.
Sújet 1990-jyldardyń basynan bastap, onyń Dr. Dre-men jumys istep, alǵashqy hıtterin jazǵan kezeńin qamtıdy. Fılm qarapaıym jigittiń gangsta-rep ıkonasyna, tabysty bıznesmenge jáne álemdik medıamagnatqa aınalýyn baıandaıdy. Taspada reperdiń eń tanymal trekteri, sonyń ishinde Drop It Like It’s Hot, Gin and Juice, What’s My Name jáne Nuthin’ but a ‘G’ Thang shyrqalady. Túsirilim 2026 jyldyń jazynda bastalady dep josparlanýda.
Qazaqstandyq kórermen Snýp Doggtyń «KeshYOU» tobymen birlesken jumysyn esine alady. 2024 jyldyń jazynda olar Forever Sunday tregine birlesken klıp túsirip, onda reper qazaq shapanyn kıgen. Prodúser Baıan Alaǵuzovanyń qatty nasıhattaýyna qaramastan, beınejazba áleýmettik jelilerde salqyn qabyldandy. Kóptegen tyńdarman ánniń úmitti aqtamaǵanyn jáne úlken hıtke aınalmaı tez umytylǵanyn aıtty. Degenmen álemdik deńgeıdegi ártis qatysqan joba nazar aýdararlyq oqıǵa boldy.
Buǵan deıin Snýp Doggtyń nemere aǵasy amerıkandyq reper RBX Spotify-ǵa qarsy sot isinde jeńilgeni habarlanǵan edi. Ol strımıngtik servısti tyńdalymdardy jasandy kóbeıtýmen kúrespedi, sonyń saldarynan basqa oryndaýshylar tabystarynyń bir bóligin joǵaltty dep aıyptaǵan.