Soltústik Qazaqstan oblysynda bolǵan aýyr jol apatynan segiz adam, onyń ishinde balalar zardap shekti, dep habarlaıdy infohub.kz saıty.
Jol apatynyń saldary áleýmettik jelilerde jarıalandy. Kadrlarda zardap shekken júrgizýshiniń kólikten birneshe metr qashyqtyqta jatqany, qozǵaltqyshtyń ondaǵan metrge ushyp ketkeni, al avtokólikterdiń temir úıindisine aınalǵany kórinedi.
Aldyn ala málimetter boıynsha, kóliktiń birinde alty bala bolǵan. Olardyń barlyǵy ártúrli aýyrlyqtaǵy jaraqattarmen aýrýhanaǵa jetkizildi. Oblystyq densaýlyq saqtaý basqarmasynyń baspasóz qyzmeti zardap shekkenderdiń jaǵdaıy týraly keıinirek habarlaıtynyn aıtty.
Soltústik Qazaqstan oblysy polısıa departamentiniń baspasóz qyzmetiniń naqtylaýynsha, Mazda jáne Toyota Estima kólikteriniń qatysýymen bolǵan jol apaty Petropavl – Kókshetaý tas jolynyń Aqqaıyń aýdanyndaǵy Astrahanka aýyly mańynda oryn alǵan.
«Apat saldarynan Mazda kóliginiń júrgizýshisi men Toyota Estima salonynda bolǵan jeti adam medısınalyq mekemelerge jetkizildi. Jol apaty faktisi boıynsha qylmystyq is qozǵaldy. Qazirgi ýaqytta oqıǵanyń mán-jaıy anyqtalýda. Tergeý nátıjesi boıynsha prosesýaldyq sheshim qabyldanady», — dep túsindirdi oblystyq polısıa departamenti.
Polısıa qyzmetkerleri júrgizýshilerge jyldamdyq rejımin qatań saqtaý, jol jáne aýa raıy jaǵdaılaryn eskerý, qarsy jolaqqa shyǵýǵa jol bermeý jáne rólde óte muqıat bolý qajettigin eskertti.
Sonymen qatar oblys turǵyndary apattyń qaıtadan jeke tasymaldaýshynyń qatysýymen bolǵanyn talqylap jatyr. Soltústikqazaqstandyqtar qosymshalar arqyly qalaaralyq jeke tasymaldaýdyń qaýipsizdigi máselesin birneshe ret kótergen. Olardyń pikirinshe, taksı júrgizýshileri tabys tabý úshin kúnine birneshe reıs jasaıdy, jyldamdyqty aıtarlyqtaı arttyrady jáne telefonǵa alańdaıdy.
Sońǵy jyldary óńirde mundaı tasymaldaýshylardyń qatysýymen birneshe jol apaty tirkeldi. 2026 jylǵy sáýirde Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty kinásinen apatta Germanıa azamattarynyń otbasy – jas áıel, onyń ákesi men kúıeýi qaza tapqan júrgizýshige úkim shyǵardy. 29 jastaǵy er adam jalǵa alynǵan kólikte mobıldi qosymsha arqyly jeke taksımen aınalysqan. Sot oǵan bes jyl bas bostandyǵynan aıyrý jáne jeti jylǵa kólik júrgizý quqyǵynan aıyrý jazasyn taǵaıyndady, jazany mınımaldy qaýipsizdiktegi qylmystyq-atqarý júıesi mekemesinde óteýge belgiledi.