Petropavlda sot saqtandyrý kompanıasynan jol apatynan keıin kólik ıesine 2 mln teńgeden astam ótemaqy óndirdi, dep habarlaıdy infohub.kz saıty.
Soltústik Qazaqstan oblysy sottarynyń resmı Telegram-arnasynda habarlanǵandaı, Petropavl №2 soty kólik ıesiniń saqtandyrý kompanıasyna qatysty azamattyq isin qarady. Talapker kólikke keltirilgen zalal mólsherin anyqtaý nátıjelerin jalǵan dep tanýdy jáne saqtandyrý tólemin óndirýdi surady.
Sotqa júginýge sebep bolǵan jol-kólik oqıǵasynyń kinálisi ákimshilik jaýapkershilikke tartyldy. Onyń azamattyq-quqyqtyq jaýapkershiligi saqtandyrý kompanıasynda saqtandyrylǵan.
Saqtandyrý jaǵdaıy oryn alǵannan keıin saqtandyrý kompanıasy kólikti jóndeý qunyn 674 413 teńge dep baǵalady. Bul somamen kelispegen kólik ıesi táýelsiz baǵalaýshyǵa júgindi, ol tozýdy eskere otyryp, shyǵyndy 2 325 106 teńge dep anyqtady.
Odan keıin kólik ıesi saqtandyrý ombýdsmenine saqtandyrý tólemin qaıta qaraý týraly talappen júgindi. Ótinishti qaraý nátıjesi boıynsha tólem somasy 873 748 teńge bolyp belgilendi. Buǵan da kelispegen talapker sotqa júgindi.
Sot talqylaýy barysynda sot avtotaýartaný saraptamasy taǵaıyndaldy. Sarapshynyń qorytyndysy boıynsha, tozýdy eskere otyryp, zaqymdalǵan kólikti qalpyna keltirý úshin qajetti jóndeý jumystarynyń, qosalqy bólshekter men materıaldardyń quny 1 829 499 teńgeni qurady.
Sot saraptama qorytyndysyn durys dep tanydy, sebebi zertteý bilikti mamanmen belgilengen talaptardy saqtaı otyryp júrgizildi. Saraptama saqtandyrý kompanıasy belgilegen jóndeý qunynyń tómendetilgenin rastady.
Nátıjesinde sot saqtandyrý kompanıasynyń esep-qısabyn jalǵan dep tanyp, kólik ıesiniń paıdasyna 1 829 499 teńge mólsherinde saqtandyrý tólemin óndirdi. Sonymen qatar saqtandyrý kompanıasynan sot shyǵyndary da óndirildi. Talapkerge tólenetin jalpy soma 2 039 821 teńgeni qurady.
Sot sheshimi Soltústik Qazaqstan oblystyq sotynyń azamattyq ister jónindegi apelásıalyq alqasymen ózgerissiz qaldyrylyp, zańdy kúshine endi.