Soltústik Qazaqstan oblysynda sot áıeldiń dıagnozyna baılanysty aıyrylǵan kólik júrgizý quqyǵyn qalpyna keltirdi, dep habarlaıdy infohub.kz saıty.
Soltústik Qazaqstan oblysy sottarynyń resmı Telegram-arnasynda habarlanǵandaı, Esil aýdandyq soty áıeldiń polısıa departamentine kólik júrgizý quqyǵyn qalpyna keltirý týraly talap aryzy boıynsha azamattyq isti qarady. Buǵan deıin sot sheshimimen talapkerdiń kólik júrgizý quqyǵy medısınalyq qarsy kórsetkishter bolýyna baılanysty toqtatylǵan edi.
Sot otyrysy barysynda anyqtalǵandaı, atalǵan sheshim shyǵarylǵannan keıin talapker qajetti medısınalyq tekserýden ótip, saýyǵyp ketýine baılanysty dıspanserlik esepten shyǵarylǵan jáne medısınalyq qorytyndy boıynsha kólik júrgizýge jiberilgen.
QR «Jol júrisi týraly» Zańynyń 75-baby 2-tarmaǵynyń 2-tarmaqshasyna sáıkes, kólik júrgizý quqyǵy ony toqtatýǵa negiz bolǵan sebep joıylǵan kezde sot sheshimi boıynsha qalpyna keltiriledi. Kólik júrgizýge kedergi keltirgen mán-jaılardyń joıylǵanyn, jaýapker men úshinshi tulǵanyń talapty qanaǵattandyrýǵa qarsy bolmaǵanyn eskere otyryp, sot talaptardyń negizdiligi týraly qorytyndyǵa keldi.
Sot sheshimimen talap qanaǵattandyryldy. Talapkerdiń kólik júrgizý quqyǵy qalpyna keltirildi. Sheshim zańdy kúshine engen joq.