Qazaqstan Syrtqy ister mınıstrligi Soltústik Kıprdegi oqıǵa kezinde zardap shekken áıeldiń Qyrǵyzstan azamaty ekenin anyqtady, dep habarlaıdy infohub.kz.
Derekterdi naqtylaý barysynda zardap shekken áıeldiń Qazaqstanda týǵany, biraq Qyrǵyz Respýblıkasynyń azamattyǵyn alǵany belgili boldy. Bul týraly QR SİM resmı málimdedi.
Buǵan deıin jelide 22 jastaǵy Janerke Abdrazakova esimdi qyz Nıkosıadaǵy Metropol Market sýpermarketinde qarýly shabýyldan keıin óte aýyr jaǵdaıda jatqany týraly aqparat taraǵan edi. Jergilikti polısıanyń málimetinshe, 3 tamyzda saǵat 11:45 shamasynda belgisiz bireý eshqandaı sebepsiz oǵan pyshaqpen shabýyl jasap, keıin ózine de jaraqat salǵan. Ekeýi de memlekettik aýrýhanaǵa jetkizilip, dárigerlerdiń baqylaýynda jatyr.
Qazaqstan SİM-de bul oqıǵaǵa túsinikteme berdi: dıplomattar bolǵan oqıǵanyń mán-jaıyn anyqtap, jergilikti quzyrly organdarmen baılanysta. Syrtqy saıası vedomstvo máseleni óz baqylaýyna aldy.