Sot Aq úıge CNN, MS NOW jáne Politico tilshilerin qaıta akredıtteýdi mindettedi

Buǵan deıin Aq úıge kirýge tyıym salynǵan úsh amerıkandyq jańalyq basylymynyń tilshileri sot sheshiminen keıin AQSh Prezıdenti Donald Tramptyń rezıdensıasyna qaıta kirdi, dep habarlaıdy infohub.kz saıty.

CNN habarlaýynsha, MS NOW, CNN jáne Politico ókilderi federaldyq sýdıa Tramp ákimshiligin baspasózge akredıtteýdi ýaqytsha qalpyna keltirýge mindettegennen keıin Aq úıde qaıta jumys isteı aldy.

Alaıda sot qaýlysyna qaramastan, aldyńǵy kúni tańerteń úsh basylymnyń tilshilerine qaıtadan kirý qıyndyq týǵyzdy. Sonda jańalyq uıymdary shuǵyl tyńdaý ótkizý týraly aryz berdi. Osydan keıin Tramp ákimshiligi BAQ ókilderine Aq úı aýmaǵyna qaıta kirýge ruqsat etti.

Buǵan deıin AQSH-taǵy sot CNN, MS NOW jáne Politico tilshilerin Aq úıge jibermeý zańsyz bolǵanyn anyqtady. Sýdıa Tımotı Kellı AQSh Prezıdenti Donald Tramptyń tilshilerdiń ruqsattaryn joıý týraly sheshimi «olardyń konstıtýsıalyq quqyqtaryn buzýy yqtımal» dep málimdedi.

Eske salaıyq, 18 qyrkúıekte AQSh Prezıdenti CNN, MS NOW jáne Politico tilshilerine Aq úıge kirýge tyıym salatynyn, óıtkeni bul basylymdar jalǵan jańalyq taratyp júrgenin habarlaǵan. Kelesi kúni-aq osy basylymdardyń tilshileri Aq úıge kirgizilmegenin málimdedi.

Keıin Donald Tramp osy jańalyq uıymdarynyń logotıpteri bar qoqys qaptarynyń sýretin jarıalady.

Keıinirek CNN, MSNBC jáne Politico tilshilerine Aq úıge kirýge tyıym salynǵannan keıin olar Prezıdent Donald Trampqa qarsy talap qoıǵany belgili boldy.

Janjalǵa baılanysty birqatar jetekshi amerıkandyq BAQ AQSh Prezıdenti Donald Tramp ákimshiligine boıkot jarıalady — telearnalar Aq úı basshysy qatysatyn is-sharalardy pýldyq jarıalaýdy toqtatty.