Jambyl oblysynyń mamandandyrylǵan aýdanaralyq ekonomıkalyq soty sapasyz ónim úshin qasbet plıtalaryn jetkizýshini qurylys salýshyǵa 43,5 mln teńge shyǵyn tóleýge mindettedi, dep habarlaıdy infohub.kz saıty.
Joǵarǵy sottyń resmı Telegram-arnasynda málim bolǵandaı, bul sheshimniń zańdylyǵyn apelásıalyq saty da rastady.
Qasbet plıtalary Almaty oblysyndaǵy turǵyn úı kesheniniń qurylysyna jetkizilgen. Aqaýlar anyqtalǵan soń jetkizýshi sapasyz plıtalardy aýystyrdy. Alaıda qaıta ornatqannan keıin panelder qaıtadan buzyla bastady. 2,8 myń sharshy metrden astam aýmaqta kóptegen jaryqtar tabyldy.
Zerthanalyq zertteýler plıtalardyń beriktigi men tyǵyzdyǵy belgilengen talaptarǵa saı emestigin rastady.
Qurylys salýshy aqaýly plıtalardy óz esebinen buzyp, aýystyrýǵa, sondaı-aq ilespe jumystardy oryndaýǵa májbúr boldy. Oǵan shamamen 23 mln teńge jumsaldy.
Buǵan deıin qurylys salýshy jetkizýshiden sapasyz taýardyń quny 19,35 mln teńgeni óndirip alǵan bolatyn.
Sotqa qaıta júgingende qurylys salýshy jetkizilgen ónimniń sapasyzdyǵy oǵan jalpy somasy 43 mln teńgeden astam shyǵyn ákelgenin kórsetti. Onyń quramyna aqaýly plıtalardy jetkizýdiń saldaryn joıý shyǵyndary kirdi.
Jetkizýshi talapqa qarsylyq bildirip, panelderdiń buzylýy tapsyrys berýshiniń olardy ornatý tehnologıasyn buzýynan bolǵanyn alǵa tartty.
İsti sot talqylaýyna daıyndaý kezeńinde Astananyń mamandandyrylǵan aýdanaralyq sotynda taraptar eksterrıtorıalyq sottylyqty qoldaný týraly ótinishhat jasady. Sot uıǵarymymen is Jambyl oblysynyń mamandandyrylǵan aýdanaralyq ekonomıkalyq sotyna jiberildi.
İsti qaraǵan sot talap qoıýshynyń shyǵyndary men jaýapkerdiń taýar sapasy jónindegi mindettemelerin tıisinshe oryndamaýy arasyndaǵy sebeptik baılanysty anyqtady. Jaýapkerdiń ornatý tehnologıasyn buzý týraly dálelderi rastalmady.
Birinshi satydaǵy sot jaýapkerden talap qoıýshynyń paıdasyna 43,5 mln teńge shyǵyn, sondaı-aq 4,3 mln teńge sot shyǵystaryn óndirip aldy.
Apelásıalyq tártipte sot aktisi ózgerissiz qaldyryldy.