Jambyl oblysynda sot medıasıasy 37 jyl buryn týyndaǵan asyraýshysynan aıyrylý boıynsha járdemaqy taǵaıyndaý týraly daýdy retteýge kómektesti, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, Baızaq aýdandyq soty áıeldiń Halyqty áleýmettik qorǵaý salasyndaǵy retteý jáne baqylaý komıtetiniń departamentine qoıǵan talaby boıynsha ákimshilik isti qarady. Talapkerdiń anasy 1989 jyly qaıtys bolǵan, al talapkerdiń ózi bala kezinen ekinshi toptaǵy múgedek. Anasy qaıtys bolǵanǵa deıin ol óz betinshe tabys taba almaǵandyqtan, anasynyń asyraýynda bolǵan.
Áıel departamentke asyraýshysynan aıyrylý boıynsha járdemaqy taǵaıyndaý týraly ótinishpen júgingen, alaıda onyń ótinishi qanaǵattandyrylmaǵan. Jaýapker aldymen anasynyń asyraýynda bolǵanyn anyqtaý qajet ekenin túsindirgen. Bas tartýmen kelispegen talapker sotqa talap aryz bergen.
Sot júrgizgen tatýlasý rásimderi barysynda taraptar daýdy medıasıa tártibimen retteý týraly kelisimge qol jetkizdi. Kelisim sharttary boıynsha talapker járdemaqy taǵaıyndaý týraly ótinishpen departamentke qaıta júginýge mindettendi, al jaýapker ótinishti tıisti túrde qarap, ol boıynsha ońtaıly sheshim qabyldaýǵa mindettendi. Kelisimge qol jetkizýge baılanysty talapker qoıylǵan talaptardan bas tartty, al sot medıasıa sharttaryn bekitip, ákimshilik talap aryzdy qaıtardy. Sonymen qatar, talapkerge memlekettik baj qaıtaryldy. Uıǵarym zańdy kúshine endi.