InfoHub Logo

Astana sotynda bloger Erbolat Janabylov pen Elmıra Tólegenovaǵa qatysty qylmystyq is boıynsha aıyptaý aktisi oqyldy. Sotta anyqtalǵandaı, atalǵan tulǵalar áleýmettik jelide ózderiniń baqýatty ómirin kórsetip, kópshilikti sendirý arqyly aqsha tabýdy kózdegen.

Bul týraly Infohub.kz aqparat agenttigi habarlaıdy.

Mánsiz vıdeokýrstar arqyly aqsha tabý jospary

Tergeý málimetterine súıensek, 2025 jyly blogerler asa iri kólemde qarjy tabý maqsatynda qylmystyq jospar qurǵan. Olar 30 myń teńgeden satylatyn vıdeokýrstardy usynǵanymen, bul kýrstardyń bilim berý nemese ekonomıkalyq qundylyǵy bolmaǵan. Tipti, bul materıaldar buryn da basqa platformalarda jarıalanǵan eken.

«Kýrstar azamattardy ruqsat etilmegen utys oıyndaryna tartý arqyly tabys tabýǵa baǵyttalǵan. Olar lotereıany búrkemeleıtin qyzmet atqardy. Kýrs satamyz dep, lotereıa ótkizý erejelerin ázirlegen. Lotereıa merzimi 4 aıǵa, ıaǵnı 2025 jyldyń 21 tamyzynan 31 jeltoqsanyna deıingi ýaqytqa belgilengen», – delingen aıyptaý aktisinde.

Erejege sáıkes, kepildendirilgen júldeler retinde 10 Hyundai avtokóligi, iPhone telefondary, sondaı-aq 5 myńnan 2 mıllıon teńgege deıingi aqshalaı syıaqylar qarastyrylǵan. Jalpy júlde qory 200 mıllıon teńgeden asqan. Al kýrstardy satýdan 487 mıllıon teńgege jýyq qarajat jınaý josparlanǵan.

200 mln teńgeden astam tabys

Prokýrordyń málimetinshe, aksıaǵa 16 249 adam qatysyp, olardyń árqaısysy 30 myń teńgeden tólegen. Osylaısha, shyǵyndardy eseptemegenniń ózinde, sottalýshylar 200 mıllıon teńgeden astam taza tabys tabýdy kózdegen.

Aıyptaý aktisinde Janabylovtyń áreketteri tutynýshylardy ádeıi aldaýǵa baǵyttalǵany aıtylady. Ol avtokólik utyp alý múmkindigi týraly jalǵan aqparat taratqan. Shyn máninde, taraptar arasyndaǵy kelisim tek onlaın-kýrstardy satýmen shektelgen. Júldelerdi utysqa shyǵarý Instagram jelisindegi jeke paraqshalar arqyly júrgizilgen, al resmı korporatıvtik saıt nemese zańdy tulǵanyń akkaýnty qoldanylmaǵan.

Janabylov pen Tólegenovanyń Instagram akkaýnty jeke paraqshalary bolǵandyqtan, olar jeke kásipker retinde áreket etken.

«Tergeý barysynda Janabylov pen Tólegenova arasynda aksıalardy ótkizý qyzmetin retteıtin sharttyq-quqyqtyq qatynastardyń bolmaǵany anyqtaldy. Qylmystyq nıetti júzege asyrý úshin olar jeke kásipkerler arasynda qyzmet kórsetý týraly formaldy sharttar jasasqan. Jarnamalyq naýqandar da zańdy tulǵanyń aty-jónin kórsetpeı, Janabylovtyń jeke atynan júrgizilgen. Bul naqty uıymdastyrýshyny jasyrý nıetin bildiredi», – deıdi prokýror.

Kólik utý múmkindiginiń tómendigi

Oljas Haırýllaevtyń aıtýynsha, jarnama rolıginde baraban aınalyp, júlde utysqa shyǵatyny kórsetilgenimen, shyn máninde avtokólik utý yqtımaldyǵy vıdeoda kórsetilgennen áldeqaıda tómen bolǵan. Tergeý kezinde utys mehanızmine ózgerister engizilgeni de anyqtaldy: 5000 teńge utý yqtımaldyǵy basqa júldelerge qaraǵanda joǵary bolǵan.

«Aıyptalýshylardyń baraban parametrlerine tehnıkalyq ózgerister engizýge múmkindigi bolǵany jáne mundaı áreketterdiń saldaryna túsingeni eskerilip, bul sheshimder ádeıi qabyldanyp, utys nátıjelerin burmalaýǵa baǵyttalǵan dep baǵalanady», – deıdi memlekettik aıyptaýshy.