Ońtústik Qazaqstan qoryq aımaǵynda ken oryndaryn ıgerýdi josparlap otyrǵan Sozak Oil and Gas gaz óndirý kompanıasynyń menshik qurylymy túbegeıli ózgerdi: 2026 jyldyń birinshi jartyjyldyǵynda negizgi ıesi óz úlesin aıtarlyqtaı qysqartty, al kapıtalǵa birden bes jańa ınvestor kirdi. Sonymen qatar kásiporynnyń taza shyǵyny shamamen 17 ese ósip, 1,1 mlrd teńgege jetti, dep habarlaıdy infohub.kz saıty.
2026 jylǵy 30 maýsymda aıaqtalǵan alty aılyq qarjylyq eseptilikke sáıkes, buryn aksıalardyń 49,2%-yn baqylaǵan nıderlandylyq Sino–Science Netherlands Petroleum B.V. óz úlesin 12%-ǵa deıin qysqartty. Al onymen baılanysty Sino–Science Netherlands Energy Group B.V. qurylymy úlesin 7,859%-dan 10,495%-ǵa deıin ulǵaıtty.
Sozak Oil and Gas kompanıasynyń eń iri aksıoneri 18% aksıa alǵan jańa Yongyou Technology Services Limited kompanıasy boldy. Menshik ıeleri qataryna sondaı-aq Global Petro Ventures Limited — 9,2%, Wisestrategy Capital Management Pte. Ltd — 4%, Summit Peak Capital Investment Pte. Ltd — 3% jáne Richfort Global Capital Management Pte. Ltd — 3% kirdi.
Óz baǵaly qaǵaz paketterin sıngapýrlyq Singapore Charter Power Pte. Ltd (17%) men Singapore Starlights Energy Investment Pte. Ltd (5,855%), sondaı-aq qazaqstandyq «Maten Petroleým» AQ (10%) men Luck Gain International Limited (5,45%) saqtap qaldy. Ufirst Energy Group Limited úlesi 4,636%-dan 2%-ǵa tómendedi.
Yonyou Technology Services — kásiporyndardy basqarýǵa arnalǵan baǵdarlamalyq jasaqtama (ERP), bulttyq servıster jáne sıfrlyq transformasıa sheshimderi boıynsha Qytaıdyń eń iri provaıderi. Nıderlandyda tirkelgenine qaramastan, Qazaqstandaǵy munaı-gaz jobalaryna Sino-Science Netherlands arqyly dál qytaılyq ınvestorlar qatysyp otyr.
2026 jyldyń birinshi jartyjyldyǵynda Sozak Oil and Gas kompanıasynyń taza shyǵyny 1,1 mlrd teńge boldy, al 2025 jyldyń osy kezeńinde ol 65,5 mln teńge deńgeıinde edi. Kompanıanyń jartyjyldyq operasıalyq shyǵyny 72,08 mln teńge boldy (bir jyl buryn 78 mln teńge). Al baǵamdyq aıyrma boıynsha shyǵystar 1,16 mlrd teńgege (1 158 434 myń teńge) jetti.
Kásiporynnyń 2026 jylǵy 30 maýsymdaǵy jıyntyq aktıvteri 73,95 mlrd teńgege baǵalanady. Onyń 68,16 mlrd teńgesi barlaý jáne baǵalaý aktıvterine tıesili.
Buǵan deıin QR Energetıka mınıstrligi Sozak Oil and Gas kompanıasyna alty ken ornynda — Asa, Kendirlik, Ortalyq, Oppaq, Tamǵalytar jáne Prıdorojnoe Iýjnoe — gaz óndirýge ruqsat beretin úkimet qaýlysynyń jobasyn jarıalaǵan. Olardyń barlyǵy Ońtústik Qazaqstan memlekettik qoryq aımaǵynda ornalasqan. Zań boıynsha mundaı jerlerde paıdaly qazbalardy óndirý tek «erekshe jaǵdaılarda, úkimet sheshiminiń negizinde» múmkin.