Halyqaralyq reıtıńtik agenttik S&P Global Ratings Qazaqstannyń egemendik kredıttik reıtıńin 2016 jyldan beri alǵash ret «BBB-» deńgeıinen «BBB» deńgeıine kóterdi. Reıtıń boıynsha boljam — «Turaqty», dep habarlaıdy infohub.kz saıty.
Agenttik mundaı sheshimdi ekonomıkanyń turaqty perspektıvalarymen, jalǵasyp jatqan ártaraptandyrýmen, sondaı-aq eldiń aıtarlyqtaı syrtqy jáne búdjettik rezervterimen túsindirdi.
S&P baǵalaýynsha, syrtqy táýekelder men álemdik shıkizat baǵasynyń aýytqýyna qaramastan, Qazaqstan ekonomıkasy orta merzimdi perspektıvada ósýdi jalǵastyrady. Sarapshylar 2026 jyldyń qorytyndysy boıynsha eldiń naqty JİÓ ósimi 5,1 paıyzdy quraıdy dep kútedi. Sonymen qatar, agenttiktiń boljamy boıynsha, Qazaqstan munaı eksporttaýshy elder arasynda salystyrmaly túrde joǵary ósý qarqynyn saqtaıdy.
S&P sondaı-aq shıkizatty óńdeý men ınfraqurylymdy damytýǵa baǵyttalǵan aýqymdy ınvestısıalyq baǵdarlamany atap ótti. Atap aıtqanda, «Báıterek» ulttyq holdıńi arqyly jobalardy qarjylandyrý ınvestısıa kólemin JİÓ-niń 30 paıyzyna deıin arttyrýǵa kómektesýi tıis.
Agenttik búdjet shyǵystarynyń ósýin tejeý jáne salyq bazasyn keńeıtý búdjet tapshylyǵyn birtindep qysqartýǵa múmkindik beredi dep sanaıdy.
S&P Qazaqstannyń kúshti syrtqy pozısıasyn bólek atap ótti. Valútalyq aktıvterdiń aıtarlyqtaı kólemi ortasha syrtqy qaryzdan asyp túsedi, osynyń arqasynda el iri syrtqy kredıtor mártebesin saqtap otyr.
Agenttik bank sektorynyń jaı-kúıin de oń baǵalady. Sarapshylardyń pikirinshe, retteý men qadaǵalaýdy kúsheıtý bankterdiń makroekonomıkalyq soqqylarǵa tózimdiligin arttyryp, aktıvter sapasyna baılanysty júıelik táýekelderdi tómendetti.
Buǵan deıin Qazaqstannyń egemendik kredıttik reıtıńi «BBB-» deńgeıinde bolǵan edi.