Nemis startapy Isar Aerospace Spectrum zymyranyn sátti ushyrdy. Ushyrý 5 qyrkúıek keshke Norvegıadaǵy Annóıa aılaǵynan júzege asty. Bul zymyrannyń ekinshi synaq ushýy boldy, dep habarlaıdy infohub.kz saıty.
Starttan shamamen tórt mınýt ótken soń Spectrum shamamen 100 shaqyrym bıiktikke kóterildi, bul ǵaryshtyń shartty shekarasy bolyp sanalady. Keıin jerústi stansıalarynyń aımaǵynan shyǵyp ketýine baılanysty zymyranmen baılanys úzildi.
Bul ushý — jeke eýropalyq kompanıa zymyranynyń Eýropa aýmaǵynan ǵaryshqa jetken alǵashqy jaǵdaıy. 2025 jyldyń naýryzynda Spectrum-tyń alǵashqy ushyrýy sátsiz aıaqtalǵan edi — zymyran starttan keıin shamamen 30 sekýndtan soń qulaǵan.
Bul joly Spectrum birneshe ýnıversıtetter ázirlegen bes ǵylymı spýtnık pen ǵylymı eksperımentti alyp ushty. Barlyq apparattardyń orbıtaǵa shyǵarylǵany ázirge belgisiz.
Spectrum-tyń ekinshi ushyrýy tehnıkalyq aqaýlar men qaýipsizdik máselelerine baılanysty birneshe ret keıinge shegerilgen bolatyn. Isar Aerospace jyl sońyna deıin taǵy birneshe ushyrýdy júzege asyrýdy josparlap otyr. Serıalyq óndiriske shyqqannan keıin kompanıa jylyna shamamen 40 zymyran ushyrýdy kózdeıdi. Spectrum-tyń sátti ushýy Eýropaǵa spýtnıkterdi orbıtaǵa shyǵarýda amerıkandyq kompanıalarǵa táýeldilikti azaıtýǵa kómektesýi tıis. Qazir eýropalyq spýtnıkterdiń edáýir bóligin SpaceX orbıtaǵa shyǵarady.
Buǵan deıin «Kýrsıv» Úndistannyń alǵashqy jeke orbıtalyq zymyrany Vikram-1-di ushyrǵanyn habarlaǵan bolatyn.