Memlekettik balalar men jasóspirimder sport mektepteri jańa qarjylandyrý júıesine kóshiriledi. Endi búdjet qarajatynyń kólemi mekemeniń smetasyna ǵana emes, tárbıelenýshiler sanyna qaraı esepteletin bolady, dep habarlaıdy saıty infohub.kz.
Týrızm jáne sport mınıstrligi memlekettik balalar men jasóspirimder sport mektepterin (DÚSSh) jan basyna shaqqandaǵy normatıvtik qarjylandyrý ádistemesin bekitti. Ol 2026 jyldyń shilde aıynyń sońyna qaraı kúshine enedi.
Jańa júıe boıynsha memleket árbir sportshyǵa ketetin shyǵynnyń kepildi kólemin esepteıdi. Normatıvke jattyqtyrýshylar men ákimshilik qyzmetkerlerdiń jalaqysy, sporttyq kıim men jabdyq, jarystarǵa jáne oqý-jattyǵý jıyndaryna qatysý, sondaı-aq farmakologıalyq qamtamasyz etý kiredi. Al ǵımarattardy kútip-ustaý, komýnaldyq qyzmetter, baılanys jáne kólik shyǵyndary burynǵysha smeta boıynsha jeke qarjylandyrylady.
Qarjylandyrý kólemi balanyń qandaı sport túrimen aınalysatynyna da baılanysty bolady. Barlyq sport túrleri shyǵyndylyǵyna qaraı úsh sanatqa bólindi. Eń qymbat tobyna, mysaly, shaıbaly hokeı, sý sporty túrleri, at sporty, bıatlon, kerlıng, jelkendi sport jáne kıbersport kirdi. Ortasha tobyna — fýtbol, tenıs, voleıbol, basketbol jáne sporttyq gımnastıka. Al eń az shyǵyndy topqa boks, dzúdo, MMA, shahmat, toǵyzqumalaq, sambo, kıkboksıń, karate jáne basqa da sport túrleri endi.
Sonymen qatar, avtorlar jattyqtyrýshylardyń júktemesin esepteý, oqý toptarynyń sany jáne sportshylardyń jarystar men jıyndarǵa qatysý shyǵyndarynyń biryńǵaı erejelerin belgiledi. Mınıstrliktiń oıynsha, bul búkil el boıynsha memlekettik sport mektepterin qarjylandyrýdy biryńǵaılaýǵa múmkindik beredi.