Akter Sılvestr Stallone AQSh prezıdenti Donald Tramptyń Gollıvýdqa arnaıy elshi bolý týraly usynysynan bas tartqanyn, alaıda keıin teledıdar jańalyqtarynan óziniń báribir osy qyzmetke taǵaıyndalǵanyn kezdeısoq bilgenin málimdedi, dep habarlaıdy infohub.kz saıty.
Stallone aıtýynsha, ol buǵan deıin Tramppen jeke kezdesip, osy jumysty talqylaǵan. Sonda ol bul qyzmettiń ózine sáıkes kelmeıtinin birden jetkizgen.
«Men «Raqmet, chao» dedim, óıtkeni bul múmkin emes. Gollıvýd jumys istep, damı beredi. Bul – korporatıvtik qurylym, al korporatıvtik adamdar maǵan qarjy týraly aıtqanymda tyńdamaıdy», – dedi akter The Times basylymyna bergen suhbatynda.
Alaıda Tramp 2025 jyldyń basynda osy qyzmetti taǵaıyndaǵan kezde Stallone, sondaı-aq Mel Gıbson men Djon Voıt Gollıvýdtaǵy arnaıy elshiler bolatynyn báribir kópshilikke jarıalady. «Rembo» juldyzy ol kezde usynystan bas tartyp qoıǵan edi jáne óziniń taǵaıyndalǵanyn múldem kezdeısoq bildi.
«Bir kúni keshke teledıdar kórip otyryp: «Stallone, Mel Gıbson jáne Djon Voıt bolady...» degendi estidim. Men: «Ne? Keshirińiz? Shynymen be?» dedim. Eger menen surasa, men bul múmkin emes ekenin aıtqanmyn ǵoı. Gollıvýd «feodaldyq memleketter» sıaqty qurylǵan, onda árbir iri stýdıanyń óz «kоróldigi» bar. Siz jaı kelip, alty stýdıaǵa qalaı jumys isteý kerektigin aıta almaısyz», – dep eske aldy akter.
Aıta keteıik, akter Djon Voıt pen rejıser Mel Gıbson óz qyzmetterin qýana qabyldady, biraq olar da taǵaıyndaý týraly kezdeısoq bilgen. Voıt qazir amerıkandyq kıno jáne teleóndiris úshin federaldyq salyq jeńildikterin engizýdi belsendi jaqtap júr. Al Gıbson óz jumysy aıasynda AQSh pen Italıa arasyndaǵy birlesken kınoóndiris týraly kelisimdi usyndy.
Aıtpaqshy, endi Gıbsonnyń jańa baılanystaryn qalaı paıdalanyp jatqany belgili bolyp otyr. Buǵan deıin Kursiv LifeStyle rejıserdiń Italıada «Hrıstostyń qumarlyqtary» fılminiń túpnusqasy shyqqannan keıin 20 jyldan astam ýaqyt ótken soń jalǵasyn túsirgenin jazǵan edi. Túsirilim birneshe qalada: Rım, Barı, Djınoza, Krako, Brındızı jáne Materada ótti.