Stepnogorsk qalalyq soty ekinshi deńgeıli bank bólimshesiniń dırektory men kasırdi jalpy somasy 255 mıllıon teńgeni jymqyrǵany úshin jeti jylǵa bas bostandyǵynan aıyrýǵa sottady. Bul týraly infohub.kz saıty habarlaıdy.
Aqmola oblystyq sotynyń baspasóz qyzmetiniń málimetinshe, bank bólimshesiniń dırektory Sh. kasır K.-men sóz baılasyp, nesıe mekemesiniń aqshasyn jymqyrýdy uıymdastyrǵan. 2022 jylǵy qarashadan jeltoqsanǵa deıin kasır basshynyń nusqaýy boıynsha qoımadan 1, 3, 8 mıllıon teńge somalaryn alyp shyǵyp, oǵan tapsyryp otyrǵan. Dırektor qyzmetkerge aqsha salatyn paketter men rúkzakty aldyn ala berip, keıin olardy bank ǵımaratynan alyp shyqqan. Tekserý aktisi boıynsha kemshilik somasy 255 mıllıon teńgeden asqan.
Aıyptalýshylardyń kinási dáleldemeler jıyntyǵymen rastaldy: tekserý aktisi, aýdıtorlyq qorytyndy, kemshilik týraly saraptama, kýálardyń aıǵaqtary, aıyptalýshylardyń ózderiniń moıyndaý aıǵaqtary, bank beınebaqylaý kameralarynyń jazbalary jáne istiń basqa da materıaldary.
Sot aıyptalýshylardyń áreketin jymqyrý, ıaǵnı bótenniń múlkin aldyn ala sóz baılasý arqyly bir top adamnyń qyzmet babyn paıdalanyp, asa iri mólsherde jymqyrýy dep baǵalady (Qazaqstan Respýblıkasy Qylmystyq kodeksiniń 189-baby 4-bóliginiń 2-tarmaǵy). Jeńildetetin mán-jaılar retinde dırektordyń shyn júrekten ókinýi, sondaı-aq kasırdiń jasynyń kishiligi jáne oń minezdemesi tanyldy.
Sot úkimimen Sh. men K.-ge árqaısysyna jeti jyl bas bostandyǵynan aıyrý jazasy, sondaı-aq bes jyl merzimge uıymdar men mekemelerde materıaldyq jaýapty laýazymdardy atqarý quqyǵynan aıyrý taǵaıyndaldy. Zıandy óteý bóliginde jábirlenýshige azamattyq sot isin júrgizý tártibimen sotqa júginý quqyǵy túsindirildi. Úkim zańdy kúshine engen joq. Aldyn alý maqsatynda úkimdi jarıalaý kezinde bank fılıalynyń qyzmetkerleri qatysty.