Memlekettik emhanalarda tar mamandardyń joqtyǵy qazaqstandyqtardy qabyldaý men tekserýdi jekemenshik klınıkalarda aqyly jasaýǵa májbúrlep otyr. Threads áleýmettik jelisiniń qoldanýshysy Bekbolat Hýanbaev kenetten shyqqan bórtpeni emdeý áreketi bir aılyq stıpendıasyna teń somaǵa túskenin aıtty, dep habarlaıdy infohub.kz saıty.
«Búgin Qazaqstanda aýyryp qalý da — sán-saltanat ekenin túsindim. Deneme bórtpe shyqty. Kútpeıin dep, tirkelgen jerimdegi memlekettik emhanaǵa bardym. Dermatolog joq. Kelesi aıda kelińiz», — dep jazady qazaqstandyq.
Bekbolat dárigerge bórtpeniń sol kúni shyqqanyn jáne qaralý qajettigin túsindirdi. Sodan keıin ony aqyly klınıkaǵa jiberdi.
«Qoljetimdi klınıka retinde usynylǵan Emırmedke bardym. Dermatolog qabyldaýy 7 000 teńge. Jaraıdy. Dáriger eki analız taǵaıyndady», — dep jazdy ol.
Qazaqstandyq qazir stýdent ekenin jáne tekserý men emdeýdi qosa eseptegende 15–20 myń teńgege syıǵyzýdy josparlaǵanyn naqtylady.
«Biraq maǵan shot qoıǵanda (…), eki analız úshin 49 000 teńge boldy. Bul — meniń búkil stıpendıama. Onyń ústine dári de satyp ala qoıǵan joqpyn. Endi otyryp oılanamyn: qalaı emdelýim kerek? Medısınaǵa aqy tóleýge qarsy emespin. Dárigerler oqyǵanyn, qural-jabdyqtyń aqsha turatynyn túsinemin. Biraq qarapaıym stýdent nege analız tapsyrý, dári alý nemese bir aı ómir súrý arasynda tańdaý jasaýy kerek? Memlekettik aýrýhanada — dermatolog joq. Aqylysynda — 49 myńdyq analızder», — dep suraq qoıdy qazaqstandyq.
Pikirlerde qazaqstandyqqa onyń naqty jaǵdaıynda «az shyǵynmen» qutylýǵa bolatynyn, búkil stıpendıany jumsaýdyń qajeti joqtyǵyn aıtty. Atap aıtqanda, qoldanýshylar oblystyq teri-venerologıalyq dıspanserge tirkelýsiz-aq barýǵa bolatynyn jetkizdi.
«Teri-venerologıalyq dıspanserde árqashan tegin qabyldaıtyn. Qabyldaý, analız tapsyrý — bári tegin», — dep jazdy marzhan62168 qoldanýshysy.
Alaıda basqa pikir qaldyrýshylar másele tek memlekettik emhanalardaǵy dermatologtarda emes ekenin atap ótti. Tar mamandar jetispeıdi, olarǵa kezek te jazylǵan, sondyqtan qazaqstandyqtar jıi jekemenshik klınıkalarda aqsha jumsaýǵa májbúr.
«Bul máseleni memlekettik deńgeıde kóterý kerek. Kóbisi qarjy joqtyqtan ýaqytynda emdelmeıdi, keıbireýler úshin bári ólimmen aıaqtalady», — dep jazdy ma_cherie777s qoldanýshysy.
Buǵan deıin «Kýrsıv» 2026 jyldyń qańtar qorytyndysy boıynsha elde densaýlyq saqtaý qyzmetteri bir jylda 17%-dan astam qymbattaǵanyn, al keıbir baǵyttar boıynsha baǵa ósimi 40%-ǵa jetkenin jazǵan.