QR UQK Shekara qyzmetiniń zeınetkeri, zapastaǵy maıor Oral qalasynyń ákimine jáne qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine talap aryzben júgindi, dep habarlaıdy infohub.kz saıty.
Batys Qazaqstan oblystyq sotynyń baspasóz qyzmetinen málim etkendeı, oblystyń mamandandyrylǵan aýdanaralyq ákimshilik soty Oral qalasynyń ákimine jáne qalalyq TÚKSh, jolaýshylar kóligi jáne avtomobıl joldary bólimine (TÚKSh, JK jáne AJ bólimi) qatysty páterdi prıvatızasıalaýdan bas tartý týraly ákimdik turǵyn úı komısıasynyń hattamalyq sheshimin daýlaý týraly ákimshilik isti qarady.
Sot anyqtaǵandaı, talapker — zapastaǵy maıor, QR UQK Shekara qyzmetiniń zeınetkeri. 2019 jyly QR UQK Shekara qyzmeti 2029 áskerı bóliminiń turǵyn úı komısıasy otyrysynyń hattamasymen prıvatızasıaǵa jatpaıtyn turǵyn úıde turatyn bólim zeınetkerleriniń qyzmettik turǵyn úıin keıinnen prıvatızasıalaý maqsatynda basqa turǵyn úıge aıyrbastaý máselesi sheshildi.
QR UQK Shekara qyzmeti turǵyn úı komısıasynyń hattamalyq sheshimimen talapkerge jáne onyń otbasy múshelerine qyzmettik páterdi qaldyq quny boıynsha prıvatızasıalaý quqyǵy berildi. Qyzmettik turǵyn úı komýnaldyq menshikke qabyldanyp, TÚKSh, JK jáne AJ bóliminiń balansyna berildi.
2025 jylǵy 27 qarashada er adam páterdi prıvatızasıalaý týraly ótinishpen jergilikti atqarýshy organǵa júgindi. Alaıda turǵyn úı komısıasy otyrysynyń hattamalyq sheshimimen talapkerge turǵyn úıdi prıvatızasıalaýdan onyń «Qazaqstan Respýblıkasynyń aýmaǵynda menshik quqyǵynda ózge turǵyn úıi bar» degen negizdememen bas tartyldy.
Sot talap aryzdy qanaǵattandyra otyryp, 2019 jylǵy QR UQK Shekara qyzmeti turǵyn úı komısıasynyń hattamasymen talapkerge jáne onyń otbasy múshelerine qyzmettik páterdi qaldyq quny boıynsha prıvatızasıalaý quqyǵy berilgen degen tujyrymǵa keldi. Iaǵnı, talapkerdiń berilgen qyzmettik turǵyn úıdi prıvatızasıalaý týraly sheshimdi tıisti jáne ýákiletti organ qabyldaǵan.
Qaralyp otyrǵan jaǵdaıda er adam jáne onyń otbasy turǵyn úıge muqtaj dep tanylǵan, sondaı-aq mura boıynsha múlik alǵanǵa deıin páterdi prıvatızasıalaý týraly sheshim qabyldanǵan, demek, 2019 jylǵy QR UQK Shekara qyzmetiniń hattamalyq sheshimi turǵyn úıdi prıvatızasıalaý týraly shart jasasý arqyly oryndalýǵa tıis. Sheshim zańdy kúshine engen joq.