Atyraý oblysynyń turǵyny Sultan Sársemálıev tórt adamdy óltirgeni úshin kináli dep tanyldy. Sot úkimin jarıalaý barysynda sýdıa Zarema Hamıdýllına aıyptalýshynyń ózin-ózi qorǵaý jáne afekt jaǵdaıy týraly nusqasynyń nege rastalmaǵanyn egjeı-tegjeıli túsindirdi, dep habarlaıdy Politico.kz «Aq Jaıyq» basylymyna silteme jasap.
Sot sondaı-aq aıyptalýshynyń qylmys kezinde afekt jaǵdaıynda bolǵany týraly qorǵaýshy taraptyń ustanymyn da joqqa shyǵardy.
Sýdıanyń aıtýynsha, jábirlenýshige keminde 10 pyshaq jaraqaty salynsa, onyń ústine keıinnen deneni jasyrý áreketteri jasalsa, bul jerde ózin-ózi qorǵaý týraly aıtý múmkin emes. Bul qylmystyń maqsatty túrde jasalǵanyn kórsetedi.
Sýdıa Naýryzdyń denesi óliminen keıin 10 aıdan astam ýaqyt ótken soń baryp tabylǵanyn túsindirdi. Deneniń qatty shirip ketýine baılanysty sarapshylar teriniń aman qalǵan tustarynan tek 10 pyshaq jaraqatyn anyqtaı alǵan, alaıda mamannyń qorytyndysy boıynsha jaraqattar sany budan áldeqaıda kóp bolýy múmkin.
Sonymen qatar qaza tapqan tórt adamnyń da ólimine ákelgen soqqylar júrek tusyna jasalǵan. Al Maqsot, Násip jáne Meıramgúldiń qoldary men bilekterinde jaraqattar anyqtalǵan, bul olardyń shabýyldaýshydan qorǵanbaq bolǵanyn dáleldeıdi.
Sot sot-psıhologıalyq jáne psıhıatrıalyq saraptamanyń qorytyndysyna súıendi. Oǵan sáıkes, Sársemálıev esi durys dep tanylǵan, júıke aýrýlarymen aýyrmaıdy jáne qylmys jasaý kezinde fızıologıalyq nemese patologıalyq afekt jaǵdaıynda bolmaǵan. Sot fızıologıalyq afektiniń qysqa merzimdi kúı ekenin, al sottalýshynyń áreketteri birneshe aıǵa sozylyp, júıeli túrde júzege asyrylǵanyn atap ótti.
Sýdıanyń sózinshe, Sársemálıev qylmysqa aldyn ala daıyndalyp, sanaly túrde áreket etken, al kisi ólimine burynǵy áıeliniń týystarymen aradaǵy janjal sebep bolǵan.
«Balalaryn oılaıtyn áke olardy jetim qaldyrmas edi»
Sottalýshyǵa qarata aıtqan sózinde sýdıa eger ol jaqsy kúıeý ári jaqsy kúıeý bala bolǵanda, áıeliniń ata-anasy qyzyn keri qaıtaryp alýǵa tyryspas edi degendi alǵa tartty.
«Siz Naýryzdy qasaqana óltirdińiz, al otbasynyń qalǵan múshelerin alǵashqy qylmysym ashylyp qalady dep qoryqqandyqtan ómirden qıdyńyz. Siz jazyqsyz adamdardy óltirdińiz», – dedi Zarema Hamıdýllına.
Sýdıa sot prosesi barysynda Sársemálıevtiń jábirlenýshiler tarapynan mundaı qatygez qylmysqa ıtermeleıtindeı qandaı áreket nemese sóz bolǵanyn túsindirip bere almaǵanyn basa aıtty.
Sottalýshy bul qylmystardy balalary úshin jasaǵanyn alǵa tartqanymen, sot bul ýájdi negizsiz dep tapty.
«Balalaryn shynymen oılaıtyn áke eshqashan olardy ata-anasyz qaldyrmaıdy. Ol balalarynyń anasyn aýyr júıke aýrýymen tastap, olardyń bolashaǵyn óz qolymen tas-talqan etpeıdi», – dedi sýdıa.
Sýdıanyń aıtýynsha, búginde balalar ata-anasynyń qasynda emes, memlekettiń qamqorlyǵynda otyr. Qazir olarǵa oıynshyq nemese táttiler emes, ózderi aıyrylyp qalǵan ata-analyq mahabbat pen jylýlyq qajet.
Sondaı-aq sýdıa burynǵy áıeliniń ata-anasy sottalýshy úshin óz áke-sheshesindeı jaqyn adamdar bolýy tıis ekenin eske saldy.
«Siz óz qolyńyzben olardyń ómirin qıdyńyz, denelerin tıisti túrde jerlemeı, shuńqyrǵa tastaı salǵansyz. Naýryzdyń denesi úıdiń qasynda jatqanyn bile tura, sol jerde esh qamsyz ómir súre berdińiz. Keıin Meıramgúldi óltirip, shuńqyrdy qaıta qazyp, ony Naýryzdyń ústine kóme salǵansyz. Mundaı áreketterdi adamgershilik turǵysynan da, moraldyq turǵydan da aqtap alý múmkin emes», – dedi sýdıa.
Ol sot talqylaýy kezinde máıitterdi eksgýmasıalaý sáti túsirilgen beınejazbalar zerttelip, denelerdiń qanshalyqty buzylǵany aıqyn kóringenin qosa ketti.
«Al Naýryz ben Meıramgúl bul ómirdiń qandaı qyzyǵyn kórdi?»
Sýdıa sot prosesi kezinde jábirlenýshilerdi jaǵymsyz jaǵynan kórsetip, bolǵan jaǵdaıǵa olardy kináli etpek bolǵan Sársemálıevtiń anasy men qaryndasynyń bergen túsiniktemelerine bólek toqtaldy.
Sýdıanyń aıtýynsha, qaza tapqandar endi ózderin qorǵaı almaıdy, al sotqa usynylǵan dálelder olardyń daresine aıtylǵan aıyptardyń eshqaısysyn rastamaǵan. Sottalýshynyń anasynyń «balam ómirde qyzyq kórmedi» degen sózine sýdıa qarsy suraq qoıdy: «Al Naýryz ben Meıramgúl bul ómirdiń qandaı qyzyǵyn kórdi?».
Ol eki jábirlenýshiniń de bala kezinen múgedektigi bolǵanyn, al olardyń ómiri qaıǵyly jaǵdaıda úzilgenin atap ótti. Olar endi eshqashan armandaryna qol jetkize almaıdy, otbasyn quryp, artynan urpaq qaldyra almaıdy.
Sot aıyptalýshynyń «búkil ómirin bes balasyn tárbıeleýge jáne aýrý áıeline kútim jasaýǵa arnady» degen ýájin de qabyldamady. Sýdıanyń aıtýynsha, óz balalary men jubaıyna qamqorlyq jasaý – erlik nemese jazany jeńildetetin jaǵdaı emes, ol kez kelgen ata-ananyń tikeleı tabıǵı mindeti.
Úkimdi túsindirýdi aıaqtaı kele, Zarema Hamıdýllına Sársemálıev óz áreketimen bir adamnyń ǵana emes, tutas bir áýlettiń taǵdyryn qurtyp, marqumdardyń týystaryna ǵana emes, búkil qoǵamǵa aýyr soqqy jasaǵanyn atap ótti.
«Otbasylyq jaǵdaı qanshalyqty qıyn bolsa da, shańyraqty saqtap qalýǵa shydamdylyq, jaýapkershilik, ózara qurmet pen keshirimdilik kómektesedi. Ashý men yza eshqashan máseleni sheshpeıdi, ol tek orny tolmas qasiretke alyp keledi», – dep túıindedi sýdıa.