Until Dawn qorqynyshty oıyny jáne The Dark Pictures Anthology antologıasymen tanymal brıtandyq Supermassive Games stýdıasy 75 qyzmetkerin qysqartýdy josparlap otyr. Bul sheshim kompanıanyń qarjylyq turaqtylyǵyn qamtamasyz etý úshin qabyldandy, dep habarlaıdy infohub.kz saıty.
X áleýmettik jelisinde jarıalanǵan resmı málimdemede stýdıa ókilderi 75 áriptesimen qoshtasýǵa májbúr ekenin jetkizdi. Basshylyq qysqartýǵa ilikken qyzmetkerlerge barlyq qajetti qoldaý kórsetýge ýáde berdi. Personalmen keńesý prosesi bastalyp ketti.
Bul Supermassive Games-te sońǵy eki jarym jyldaǵy úshinshi qysqartý tolqyny. 2024 jyldyń aqpanynda kompanıadan 90-ǵa jýyq adam ketken bolsa, 2025 jyldyń shildesinde taǵy 35 maman jumystan bosatyldy. 2025 jyldyń sońyna qaraı shtatta 172 qyzmetker qaldy. Sonymen qatar, maýsym aıynda bas dırektor Robert Genrısson Directive 8020 oıyny shyqqannan birneshe apta ótken soń otstavkaǵa ketti. Sondaı-aq, Until Dawn 2 sıkveliniń ázirlenýi Sony-diń ishki bólimshesi — Firesprite stýdıasyna tapsyrylǵany belgili boldy.