Ulybrıtanıaǵa oralǵan Sasseks gersogy Garrı men gersogınásy Megannyń memleket esebinen qarjylandyrylatyn qaýipsizdigi qaıta qaralatyn boldy. Patsha áýleti men memlekettik tulǵalardyń salyq esebinen qorǵalýyn qadaǵalaıtyn Patshalyq jáne aıryqsha tulǵalar atqarý komıteti (Ravek) jubaılarǵa polısıa qorǵaýynyń qandaı deńgeıde beriletinin qaıta qarastyrady, dep habarlaıdy infohub.kz saıty.
Komıtet ótken aptada jubaılardyń jaǵdaıyn talqylaý úshin jınaldy. Endi olar balalarymen birge Ulybrıtanıada ýaqytsha qonaq retinde emes, turaqty turǵyn retinde ómir súrip jatyr.
Bul — Megan úshin alǵashqy táýekel baǵalaýy. 2020 jyly jubaılar patsha áýletiniń jumys isteıtin músheleri qatarynan shyqqan bolatyn. Garrıge qaýipsizdigin qaıta qaraý týraly sheshim shildede berilgen, alaıda ol áli kúnge deıin naqty jaýap alǵan joq.
The Telegraph basylymynyń málimetinshe, Ravek tóraǵasy ótken aptada Garrıge komıtet jańa táýekel baǵalaýyn, sondaı-aq Megan úshin jeke baǵalaýdy taǵaıyndaǵanyn, munyń bári olardyń Ulybrıtanıaǵa oralýyna baılanysty ekenin jetkizgen. Komıtet jubaılardan sheshim qabyldaý úshin kúndelikti kesteleri men tártibin, sonyń ishinde balalardy mektepke aparý-ákelý josparyn usynýdy suraǵan.
Ótken jyly Garrı İshki ister mınıstrligine qarsy sot talabynan utylyp qaldy. Sebebi jubaılar patsha áýletiniń jumys isteıtin músheleri qatarynan shyqqan soń, ol jáne onyń otbasy úshin avtomatty túrde beriletin salyq esebinen qarjylandyrylatyn qaýipsizdik toqtatylǵan edi.
«Ulybrıtanıa — meniń úıim. Ulybrıtanıa — balalarymnyń tarıhynyń ózegi ári olar qazir AQSH-ta turatyn jerindeı-aq ózin úıde sezinýin qalaıtyn oryn. Biraq olar Ulybrıtanıa jerinde bolǵanda qaýipsizdigin qamtamasyz etý múmkin bolmasa, bul oryndalmaıdy. Men áıelimdi osyndaı qaýipke tastaı almaımyn. Ómirde basymnan ótken jaǵdaılardy eskersek, ózimdi de bosqa qaterge tigýdi qalamaımyn», — degen Garrı kýálik berý kezinde.
Jubaılar Ulybrıtanıaǵa 26 tamyzda oraldy. Kóp uzamaı kоról Charlz atynan resmı hat joldanyp, olardyń patsha áýletiniń jumys istemeıtin músheleri ekeni taǵy da rastaldy. Hatta jubaılar «komersıalyq jáne qaıyrymdylyq múddeleri bar jeke azamattarǵa uqsaıdy» delingen jáne «qaýipsizdikke qatysty kez kelgen jedel másele tıisti polısıa organdaryna joldanýy tıis» dep kórsetilgen.
Sonymen qatar dúısenbide Sassekster balalaryn jańa mektepke aýystyrýǵa sheshim qabyldady. Olar buǵan deıingi mektepte nebári eki kún oqyǵan bolatyn. Buǵan uzaq jol men keptelistiń kóptigine baılanysty qaýipsizdik alańdaýshylyǵy sebep bolǵan.
«Balalardyń mektep aýystyrýy týraly sheshim otbasynyń qaýipsizdik tobymen qazirgi jaǵdaıdyń tájirıbelik jaqtaryn talqylaǵannan keıin qabyldandy», — dedi otbasynyń ókili Hello! jýrnalyna. «Ata-anasy barlyq muǵalimder men qyzmetkerlerge otbasyna kórsetken súıispenshiligi, qamqorlyǵy men eńbegi úshin sheksiz rıza. Bul sheshimdi mektepke nemese balalardyń sonda alǵan erekshe qamqorlyǵyna qatysty baǵa retinde qabyldaýǵa bolmaıdy».