Súı, jan sáýlem, taǵy da súı, taǵy da!
Jyly, tátti ý tarady qanyma.
Bul lázzattyń bir mınýtyn bermeımin,
Patsha taǵy, búkil dúnıe malyna.

Qushaqtatyp názik taldaı belińnen,
Súıgiz, sáýlem, tátti baldaı tilińnen.
Boı shymyrlap, talyqsıdy júregim,
Balqyp denem, baram erip demińnen.

Kir qoınyma, qypsha beliń buralyp,
Tarqat shashyń, jatsyn jibek oralyp.
Janym!Janym! Tezirek tısin tóske tós,
Kóz jumýly, jıi ystyq dem alyp.

Shashyń - qara, deneń aq bult, júziń – Aı,
Tisiń – merýert, kóziń, sáýlem, quralaı.
Lázzat, raqat, baqyt – bári qoınyńda,
Suramaımyn endi ujmaq – jaqsy jaı!

Súı, jan sáýlem, taǵy da súı, taǵy da!
Jyly, tátti ý tarady qanyma.
Jasaǵannan bir-aq nárse tileımin,
Ótpese tún, atpasa eken tańy da.

---