«Qazgıdromet» sınoptıkteri Qazaqstan boıynsha 26–28 qyrkúıekke arnalǵan aýa raıy boljamyn usyndy. Eldiń birqatar óńirinde temperatýra tómendep, keı jerlerde jaýyn-shashyn, onyń ishinde qar túrinde jaýady, dep habarlaıdy infohub.kz saıty.
Aıtýlarynsha, aldaǵy kúnderi respýblıka aýmaǵynyń basym bóliginde aýa raıyn soltústik-batys antısıklon anyqtaıdy. Onymen birge jaýyn-shashynsyz aýa raıy men aýa temperatýrasynyń tómendeýi kútiledi.
Osy kezeńde Qazaqstannyń batysy men soltústik-batysynda, al 27–28 qyrkúıekte soltústikte, shyǵysta jáne ońtústik-batysta jaýyn-shashynsyz aýa raıy boljanady.
Sonymen qatar shyǵysta, ortalyqta, ońtústikte jáne ońtústik-shyǵysta atmosferalyq frontaldyq bólikterdiń ótýimen naızaǵaıly jańbyr jaýady. Túngi ýaqytta Almaty oblysynyń taýly aýdandarynda jańbyr men qar túrinde jaýyn-shashyn bolýy múmkin.
Túngi jáne tańǵy ýaqytta keı jerlerde tuman bolady. Respýblıkanyń kóptegen oblysynda jel kúsheıip, ońtústikte shańdy daýyl turýy kútiledi.
Osy kezeńde soltústik pen shyǵysta, al 27–28 qyrkúıekte soltústik-batys pen ortalyqta túngi ýaqytta -1-den -3 gradýsqa deıin úsik bolady.
Aıta keteıik, kýágerler Almaty taýlarynda alǵashqy qardyń jaýǵanyn habarlady — tıisti kadrlar áleýmettik jelilerde jarıalandy.