Qazaqstanda sybaılas jemqorlyq quqyq buzýshylyqtar týraly habarlaǵan azamattardy kótermeleýdiń jańa tártibi bekitildi. UQK tóraǵasynyń buıryǵyna sáıkes, syıaqy mólsheri 17,3 mıllıon teńgege deıin jetýi múmkin, dep habarlaıdy infohub.kz saıty.
Ulttyq qaýipsizdik komıtetiniń tóraǵasy 5 tamyzda qol qoıǵan buıryq, daıyndalyp jatqan, jasalyp jatqan nemese jasalǵan sybaılas jemqorlyq quqyq buzýshylyq týraly habarlaǵan azamattarǵa ótinishterdi qaraý jáne syıaqy tóleý tetigin naqtylaıdy.
Qujatta laýazymdyq mindetterine belgili bolǵan sybaılas jemqorlyq faktileri týraly basshylyqqa nemese ýákiletti organdarǵa mindetti túrde habarlaý kiretin memlekettik qyzmetshiler UQK-niń Sybaılas jemqorlyqqa qarsy qyzmeti nemese onyń aýmaqtyq organdary tarapynan kótermelenetini atap ótilgen. Olar úshin gramota nemese alǵys jarıalaý qarastyrylǵan.
Arnaıy formýla boıynsha esepteletin syıaqy mólsheri para somasyna nemese keltirilgen zalalǵa baılanysty bolady. Tólemniń eń joǵary mólsheri kezinde azamat 17,3 mln teńgege deıin ala alady. Bul soma qoldanystaǵy normatıvter men 2026 jylǵa arnalǵan AEK mólsherine negizdelgen.
Azamat ótinish bildirgennen keıin, sybaılas jemqorlyqqa qarsy is-qımyl organy 10 jumys kúni ishinde UQK-niń Sybaılas jemqorlyqqa qarsy qyzmetine nemese aýmaqtyq organǵa qajetti qujattardy jiberedi. Bul rette gramotamen marapattaý nemese alǵys jarıalaý úshin azamattyń ótinishi qujattar paketine qosylmaıdy.
Materıaldardy alǵannan keıin Qyzmet nemese aýmaqtyq organ bes jumys kúni ishinde olardyń tolyqtyǵyn jáne belgilengen talaptarǵa sáıkestigin tekseredi. Sodan keıin materıaldardy arnaıy komısıa qaraıdy, onyń quramyna Qyzmettiń nemese UQK aýmaqtyq organynyń keminde bes qyzmetkeri kirýi tıis.
Eger komısıa kótermeleý týraly sheshim qabyldasa, Qyzmet nemese aýmaqtyq organ basshysy bir jumys kúni ishinde tıisti buıryq shyǵarady. Bul buıryq birjolǵy aqshalaı syıaqy tóleýge, sondaı-aq gramotamen marapattaýǵa nemese alǵys jarıalaýǵa negiz bolady.
Aqsha buıryq shyqqannan keıin bir aı ishinde ótinish berýshiniń banktik shotyna aýdarylýy tıis. Birjolǵy syıaqy mólsheri belgilengen erejelerge sáıkes sybaılas jemqorlyq týraly habarlamany qaraý mán-jaılary men nátıjelerine baılanysty aıqyndalady.
Buıryq 22 tamyzda kúshine enedi.