Mańǵystaý oblysynyń turǵyny 700 myń teńgege altyn syrǵa satyp alyp, 70 jasqa tolǵan qaıyn enesine syılyqqa bergen. Biraq syılyq tabys etilgennen keıin nebári bir jarym saǵat ótkende syrǵa synyp, satýshy aqshany qaıtarýdan bas tartqan. Alaıda saýda departamenti aralasqan soń, aqsha tolyǵymen qaıtaryldy, dep habarlaıdy infohub.kz.
Mańǵystaý oblysynyń turǵyny Instagram áleýmettik jelisi arqyly 700 myń teńgege altyn syrǵa satyp alǵan. Ol bul syılyqty qaıyn enesiniń 70 jyldyq mereıtoıyna arnaǵan. Syrǵany toıǵa shamamen bir aı qalǵanda satyp alyp, merekege aldyn ala daıyndalǵan. Alaıda syılyq tabystalǵannan keıin bir jarym saǵat ótkende syrǵalardyń biri synyp ketken: ol ortasynan jarylyp, eki bólikke bólingen. Keıin buıymnyń qosylý elementi óte jińishke bolyp jasalǵany anyqtalǵan.
Tutynýshy satýshyǵa taýardy aýystyrýdy nemese aqshasyn qaıtarýdy talap etken. Satýshy satyp alýdan bir aı ótkenin syltaýratyp, talapty qanaǵattandyrýdan bas tartqan. Osydan keıin tutynýshy Mańǵystaý oblysy boıynsha saýda jáne tutynýshylar quqyn qorǵaý departamentine júgingen. Mamandar «Tutynýshylar quqyn qorǵaý týraly» QR Zańy aıasynda jumys júrgizip, buzylǵan quqyqtardy qalpyna keltirýge kómektesken. Nátıjesinde satýshy taýardyń tolyq quny – 700 myń teńgeni qaıtarǵan.
Vedomstvo qyzmetkerleri eske salady: eger siz sapasyz taýar satyp alsańyz nemese tutynýshy retinde quqyǵyńyz ózgeshe buzylsa, zańdy múddeńizdi qorǵaý úshin departamentke júginýińizge bolady.