Aq úı apparatynyń basshysy Súzı Ýaılz qaterli isikten tolyq aıyqqanyn málimdedi. Bul týraly ol óziniń X áleýmettik jelisindegi paraqshasynda jazdy, dep habarlaıdy infohub.kz saıty.

Ýaılzdiń aıtýynsha, osy aptanyń basynda Meıo klınıkasyna barǵan soń patologıalyq tekserý nátıjeleri «taza» shyqqan. Bul habar onyń dıagnoz qoıylǵanyn jarıalaǵanyna dál alty aı tolǵan kezge tuspa-tus keldi.

69 jastaǵy Ýaılz AQSh prezıdenti Donald Tramp ákimshiligindegi eń yqpaldy tulǵalardyń biri sanalady ári memleket basshysyna erekshe jaqyn adam. Jazbasynda ol Trampqa «myzǵymas qoldaýy» úshin alǵys aıtyp, «Amerıka birinshi» baǵdarlamasyn ilgeriletý jumysyn jalǵastyratynyn ýáde etti.

Dıagnoz qoıylǵannan keıingi alty aılyq em-dom kezinde Ýaılz Aq úıdegi jumysyn qashyqtan jalǵastyrǵan.

Naýryzdaǵy málimdemesinde Ýaılz áıelderdiń segizden birine sút bezi qaterli isigi dıagnozy qoıylatynyn aıtqan edi.

«Bul áıelder kún saıyn otbasyn asyrap, jumysqa baryp, qaýymdastyǵyna kúsh-jigeri men qaısarlyǵymen qyzmet ete beredi. Men endi solardyń qataryna qosyldym», — degen ol.

Sársenbidegi jazbasynda ol emi týraly qosymsha málimet jarıalaǵan joq.

Ýaılz — Aq úı apparatynyń basshysy qyzmetin atqarǵan alǵashqy áıel. Bul laýazym Aq úıdegi eń mańyzdy ról sanalady. Osy qyzmette ol prezıdenttiń kún tártibiniń oryndalýyn qadaǵalap, Tramp úshin súzgish rólin atqarady, sondaı-aq saıasat úılestirýshisi ári saıası keńesshisi bolady.

Bul qyzmetke kirispes buryn Ýaılz Tramptyń 2024 jylǵy prezıdenttik naýqanynda aıtarlyqtaı ról atqarǵan.

Alaıda onyń qyzmeti daý-damaısyz ótpedi. Jeltoqsanda Vanity Fair jýrnaly Ýaılzben suhbattaryn jarıalap, onda ol Tramptyń Aq úıdegi jumysyna tike ári keıde syn kózben baǵa bergen.

Máselen, ol ishimdik ishpeıtinimen tanymal prezıdentti «alkogolıktiń minezi bar» dep sıpattap, biraq «ol isteı almaıtyn nárse joq. Eshteńe, nól, eshteńe» dep qosqan.

Sondaı-aq ol AQSh prezıdentine jaqyn basqa da tulǵalar týraly ashyq pikir bildirip, vıse-prezıdent Djeı Dı Vensti «konspırasıalyq teorıa jaqtaýshysy», Ilon Maskty «birtúrli, tym birtúrli adam» dep sıpattaǵan.

Alaıda AQSh prezıdenti dereý ony qorǵap shyqty, al Ýaılz Vanity Fair jarıalanymyn ákimshilik týraly «bylyqqan ári teris baıan» jasaý úshin «mańyzdy konteksti» alyp tastady dep baǵalady.

Tramp pen Aq úı Ýaılzdiń málimdemesine ázirge pikir bildirgen joq.