Taılandtyń Pattaııa qalasynda 17 jastaǵy jasóspirimdi óltirip, denesin chemodanǵa salyp tastady dep aıyptalǵan 45 jastaǵy avstralıalyq azamat Saımon Pıter Karman sotta ózine taǵylǵan aıyptardy moıyndamady. Bul týraly Pattaııa provınsıalyq sotynyń ókili málimdedi, dep habarlaıdy infohub.kz saıty.
Karman maýsym aıynda tutqyndalǵan bolatyn. Oǵan deıin Bangkoktan ońtústik-shyǵysqa qaraı shamamen 150 shaqyrym jerde ornalasqan Pattaııa qalasynda turatyn Týnchanok Donhomla esimdi 17 jastaǵy qyzdyń joǵalyp ketkeni habarlanǵan. Kóp uzamaı onyń denesi salynǵan chemodan tabyldy. Polısıanyń málimetinshe, qyz tunshyǵýdan qaza tapqan.
Sot ókiliniń aıtýynsha, Karman juma kúni Pattaııa provınsıalyq sotyna kelgen. Onda ol barlyq aıyptar boıynsha óz kinásin moıyndamady. Oǵan adam óltirý, máıitti jasyrý jáne kámeletke tolmaǵan qyzdy azǵyndyq maqsatta alyp ketý aıyptary taǵylǵan. Sottyń kelesi otyrysy 12 qazanǵa belgilendi.
Buǵan deıin polısıa beınebaqylaý kameralarynyń jazbalarynda Karmannyń 25 maýsym kúni tańerteńgi ýaqytta Pattaııadaǵy turǵyn úı keshenine qyzben birge kirip, sol kúni keshke úlken qara chemodandy kóterip shyqqanyn kórsetetinin málimdegen edi.
Taıland buqaralyq aqparat quraldary ınternette jarıalaǵan polısıa tergeýiniń beınejazbasynda Karman qyz oǵan pyshaqpen qorqytqandyqtan, ózin-ózi qorǵaý maqsatynda áreket etkenin aıtqan.
Bul oqıǵa Pattaııa qalasyn el nazaryna qaıta shyǵardy. Qala sheteldik týrıser arasynda jaǵajaılarymen jáne túngi ómirimen tanymal, alaıda sonymen qatar seks-týrızmmen baılanysty bedelimen de belgili.