Taıland premer-mınıstri ári ishki ister mınıstri Anýthın Chanvırakýn kоróldikte uzaq ýaqyt turyp jatqan sheteldikterge qatań eskertý jasady. Ol olardy jergilikti bılikti paıdalanbaýǵa jáne óletin bolsa, otanyna baryp ólýge shaqyrdy, dep habarlaıdy infohub.kz saıty.
NUR.KZ-tiń RIA Novostıge silteme jasap habarlaýynsha, úkimet basshysy bul keńesti Taıland provınsıalarynyń gýbernatorlarymen ótken jınalysta aıtqan. Jergilikti Nation agenttiginiń dereginshe, qatań reaksıaǵa sheteldikterdiń jeke zırat salý týraly ótinishi sebep bolǵan.
«Jaqynda (sheteldikter tarapynan — red. eskertpesi) jeke zırat salý týraly ótinish túskenin bildim. Bul tym asyp ketti, shekten shyqqandyq. Senderdi osynda kelýge ruqsat etkenimizge alǵys aıtýlaryń kerek. Adal eńbek etip, kúnkóris tabý úshin kelýge. Eger óletin bolsańdar — otanyńa baryp ólińder. Munda ólýdiń qajeti joq. Bizdi paıdalanýǵa tyryspańdar», — dedi Chanvırakýn.
Premer sheteldikter bıliktiń ruqsatynsyz óz betinshe Taıland aýmaǵynda dinı mekemeler men qaýymdastyqtar qurmaýy tıis ekenin de qosty. Ásirese «meıramhana lısenzıasyn alyp, onyń ornyna ǵıbadat úıin ashýǵa» jol berilmeıdi.
Ol óz provınsıalarynda sheteldikterdiń quqyqqa qaıshy áreketterin, sondaı-aq olardyń Taıland dástúrleri men halqyna qurmetsizdik tanytý jaǵdaılaryn qatań túrde toqtatýdy tapsyrdy.
«Taıland sheteldikterdi qabyldaýǵa daıyn, biraq yntymaqtastyq ózara tıimdi bolýy kerek. Týrızm elge qarjy men ınvestısıa ákeledi, biraq bul eshkimge basqalardy paıdalanýǵa nemese ınvestısıany zańsyz is úshin jumsaýǵa quqyq bermeıdi», — dedi premer. Ol mundaı zańsyz iske el aýmaǵynda bıznes uıymdastyrý kezinde Taıland azamattaryn jalǵan ıeler retinde paıdalaný da jatatynyn túsindirdi.
Ol sóz bir aımaqtan ǵana emes, Azıa, Taıaý Shyǵys, Ortalyq Azıa, Eýropa jáne Afrıka memleketterinen kelgen túrli eldiń shyqqandary týraly bolyp otyrǵanyn qosty.
Basylymnyń atap ótýinshe, osy aptanyń basynda Taıland bıliginiń buıryǵymen eki jyl buryn salynǵan jeke evreı zıraty joıylǵan. Jergilikti ákimshilik onyń zırat lısenzıasyn uzartpaǵan. Taıland turǵyndarynyń kópshiligi býddızmdi ustanatyndyqtan, onyń dástúri boıynsha marqumdardyń denesi órteledi, sondyqtan elde zırat óte az. Bar zırattardyń kóbisi musylmandar men qytaılardiki. Sondaı-aq kоróldikte birneshe resmı hrıstıan zıraty bar, onyń ishinde katolık jáne protestant zırattary, sondaı-aq pravoslavıe monastyri janyndaǵy bir orys pravoslavıe zıraty bar.