Óskemende taksı júrgizýshisi qart áıelge qatysty iri alaıaqtyqtyń aldyn aldy, dep habarlaıdy infohub.kz saıty.
Shyǵys Qazaqstan oblysy polısıa departamentiniń bastyǵy, polısıa general-maıory Erlan Omarbekov Torejan Adabıetov esimdi taksıstpen kezdesti. Ol óziniń sergektigi men janashyrlyǵynyń arqasynda telefon alaıaqtarynyń zeınetkerdiń 1,5 mıllıon teńgeden astam aqshasyn jymqyrýyna jol bermedi.
Avtokólik salonynda túsirilgen vıdeo áleýmettik jelilerde tarady. Kadrlarda júrgizýshi artqy oryndyqta otyrǵan áıelge: «Kodty surasa, aıtpańyz, bular alaıaq bolýy múmkin», — dep úndeý tastaıdy. Sodan keıin taksıst zeınetkerdiń telefonyn alyp, qylmyskerlermen ózi sóılesedi: «Alo, mamýl? Iá, aǵa. — Bul sizdiń anańyz ba? — Iá, ne boldy? — Siz ony aldaǵyńyz keldi me, aqshaǵa?»
Erlan Omarbekov Torejanǵa batyl áreketi, belsendi azamattyq ustanymy jáne qylmystyń aldyn alýǵa qosqan jeke úlesi úshin shyn júrekten alǵys bildirdi. Ol dál osyndaı adamdar polısıaǵa alaıaqtyqqa qarsy kúreste naǵyz kómekshi bolatynyn jáne aınalasyndaǵylarǵa úlgi bolatynyn atap ótti.
«Búginde alaıaqtar zamanaýı tehnologıalar men psıhologıalyq áser etý ádisterin jıi qoldanady, sondyqtan bizdiń ortaq mindetimiz — mundaı qylmystardy ashý ǵana emes, olardyń aldyn alý. Tek polısıanyń, qoǵamnyń jáne árbir sanaly azamattyń kúshin biriktire otyryp, biz qylmysqa tıimdi qarsy turyp, jerlesterimizdi qorǵaı alamyz», — dedi SHQO PD bastyǵy.