Taldyqorǵanda baǵdarlamalaý men jasandy ıntellektti tegin oqytatyn Tomorrow School mektebiniń alǵashqy óńirlik kampýsy jumysyn bastady. Munda 2026 jyldyń sońyna deıin 1,5 myń adamdy oqytý josparlanýda, dep habarlaıdy infohub.kz saıty.
Kampýs oblystyq sıfrlyq tehnologıalar basqarmasy men Jetisu Digital IT-habynyń qoldaýymen «Jetisý jastary» ortalyǵynyń bazasynda ashyldy. Oqý úshin qajetti baǵdarlamalyq qamtamasyz etilgen 50 kompúter daıyndaldy. Mektep táýlik boıy tórt aýysymmen jumys isteıdi, sabaqtar 28 qyrkúıekte bastalady.
Oblystyq sıfrlyq tehnologıalar basqarmasynyń basshysy Aıdyn Temirbaevtyń aıtýynsha, oqýǵa 15 jastan asqan adamdar qatysa alady. Arnaıy bilim nemese IT salasynda tájirıbe qajet emes.
«Bul — 15 jastan asqan qatysýshylar úshin baǵdarlamalaý men jasandy ıntellekt boıynsha tegin praktıkalyq oqýdan ótýge úlken múmkindik. Mektep táýlik boıy tórt aýysymmen jumys isteıdi. Sabaqtar 28 qyrkúıekte bastalady», — dedi Temirbaev.
Tomorrow School-ǵa túsý úshin jobanyń saıtynda tirkelip, kampýsty tańdap, ótinim toltyryp, este saqtaý jáne logıkaǵa arnalǵan eki onlaın-oıynnan ótý qajet. Sátti úmitkerler tórt aptalyq ıntensıvke shaqyrylady.
Intensıvti kýrstan keıin úzdik qatysýshylar 18 aıǵa sozylatyn negizgi baǵdarlamaǵa óte alady. Oqý kúndizgi formatta, dástúrli dárister men oqytýshylarsyz ótedi: stýdentter materıaldardy óz betinshe oqıdy, komandalarda jumys isteıdi, bir-biriniń tapsyrmalaryn tekseredi jáne baǵdarlamalaý men jasandy ıntellekt boıynsha 50-den astam praktıkalyq jobany oryndaıdy.
Tomorrow School jetekshisi Áıgerim Shaımerdenova túsý úshin aldyn ala baǵdarlamalaý tájirıbesi qajet emes ekenin atap ótti.
Tomorrow School mektebi 2024 jyly Astana Hub bazasynda qurylǵan, qazir joba Qazaqstannyń óńirlerinde keńeıtilýde.