Taldyqorǵanda 14 jasar qyz tórt metrdeı tereńdiktegi ashyq qudyqqa qulap ketti. Polıseılerdiń jedel áreketiniń arqasynda balany qutqaryp qaldy, dep habarlaıdy infohub.kz saıty.
Polısıaǵa kámeletke tolmaǵan qyzdyń ashyq qudyqqa qulaǵany týraly habar tústi. Oqıǵa ornyna patrúldik polısıa rotasynyń qyzmetkerleri, «Berkýt-163» jáne «Berkýt-164» ekıpajdary dereý jetti.
Zardap shekken qyzdyń 12 jasar sińlisi olardyń mysyqtyń artynan júgirgenin aıtty. Bir sátte 14 jasar qyz ashyq qudyqty baıqamaı, ishine qulap ketken. Qudyqtyń tereńdigi shamamen tórt metr bolǵan.
«Bir mınýttaı ýaqyt joǵaltpaı, polıseıler balany jubatty, arqan túsirip, onymen únemi baılanysta bolyp, jer betine shyǵýyna kómektesti. Polısıa qyzmetkerleri Asqarbek A., Bazarbaev D., Jamanaev A., Narikbaev D. jáne Myrzahmetov D.-tyń kásibı jáne úılesimdi is-áreketteriniń arqasynda balany qutqaryp qaldy. Qyzdy dárigerlerge tapsyryp, qajetti kómek kórsetildi», — dep habarlady óńirlik polısıa departamenti.
Ýchaskelik polısıa ınspektorlary qaýipti qudyqty jabý jáne jaýapty tulǵalarǵa qatysty shara qoldaný týraly nusqama engizgeni atap ótildi.
Sondaı-aq kámeletke tolmaǵandardyń ata-analarymen balalardyń túngi ýaqytta eresekterdiń qaraýynsyz júrýine jol bermeý jáne olardyń qaýipsizdigin baqylaýdy kúsheıtý qajettigi týraly profılaktıkalyq áńgime júrgizildi.