Tarazda sot alaıaqtyq jolmen rásimdelgen, somasy mıllıon teńgege jýyq mıkrokredıtti jaramsyz dep tanydy, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, oblystyq sot apelásıalyq tártippen áıeldiń mıkroqarjy uıymyna mıkrokredıt shartyn jaramsyz dep taný týraly talap aryzy boıynsha azamattyq isti qarady.
2024 jyldyń mamyrynda talap qoıýshy men bank arasynda 999 myń teńgege mıkrokredıt sharty jasalǵan. Keıin osy shart boıynsha talap etý quqyqtary mıkroqarjy qoǵamyna (MQQ) berilgen.
Birinshi satydaǵy sot talap qoıýshynyń ózi mıkrokredıt rásimdemegenin, ony alýǵa kelisim bermegenin jáne aqshany paıdalanbaǵanyn anyqtady. Sotqa júginýge buryn zańdy kúshine engen Turar Rysqulov aýdany sotynyń úkimi negiz boldy.
Úkimge sáıkes, alaıaqtyq áreketter jasaǵany úshin kináli dep basqa áıel tanylǵan. Ol daýly mıkrokredıtti ózi rásimdegenin moıyndady. Ol talap qoıýshynyń kelisiminsiz onyń uıaly telefony men derbes derekterin paıdalanǵanyn, al alynǵan aqshany óz qalaýynsha jumsaǵanyn túsindirdi.
Jaýapker talapty moıyndamaı, ótinim elektrondy túrde rásimdelgenin, qaryz alýshynyń jeke basy bıometrıalyq sáıkestendirý arqyly rastalǵanyn, al bir rettik kod senimdi telefon nómirinen engizilgenin kórsetti.
Sot bıometrıa jeke basty anyqtaýǵa múmkindik beretinin, biraq ol ózdiginen azamattyń mámile jasaýǵa ishki erkin rastamaıtynyn atap ótti. Sonymen qatar, sot talap qoıýshynyń atyna buǵan deıin basqa MQQ-larda osyǵan uqsas tásilmen birneshe mıkrokredıt rásimdelgenin eskerdi. Qujattardy quqyq qorǵaý organdaryna berip, aıyptaý úkimi shyqqannan keıin olar boıynsha aqparat joıylyp, bereshek esepten shyǵarylǵan.
Sot daýly shart úshinshi tulǵanyń aldaýy men senimin teris paıdalanýynyń saldarynan jasaldy degen qorytyndyǵa keldi.
Taraz qalalyq sotynyń sheshimimen mıkrokredıt sharty jaramsyz dep tanylyp, jaýapkerden talap qoıýshynyń paıdasyna memlekettik baj jáne ókil kómegine jumsalǵan shyǵystar óndirildi. Sheshim uıym tarapynan shaǵymdalǵan, alaıda Jambyl oblystyq sotynyń azamattyq ister jónindegi sot alqasy sheshimdi ózgerissiz qaldyrdy.
Sot aktileri zańdy kúshine endi.