Tarazda sot moped júrgizýshisin 20 táýlikke qamady. Ol polısıadan qashpaq bolǵan. Er adam mas kúıde bolǵan jáne eshqashan júrgizýshi kýáligin almaǵan, dep habarlaıdy infohub.kz.
Patrúl kezinde Q. Turysov kóshesinde memlekettik nómirsiz mopedtegi buzýshy baıqalǵan. Ol toqtaý talabyna kónbeı, ketýge árekettengen, alaıda kóp uzamaı ustalǵan.
Tekserý kezinde polıseıler mas bolý belgilerin baıqaǵan. Medısınalyq kýálandyrý ortasha dárejedegi mas kúıdi rastady. Sonymen qatar, er adamnyń eshqashan júrgizýshi kýáligi bolmaǵany anyqtaldy.
Buzýshyǵa qatysty mas kúıde kólik júrgizý, júrgizýshi kýáliginsiz júrý jáne polısıanyń zańdy talabyna baǵynbaý faktileri boıynsha ákimshilik hattamalar toltyryldy.
Sot sheshimimen er adam 20 táýlikke qamaldy, al mopedi aıyppul turaǵyna aparyldy.
Eske sala keteıik, 2025 jyldyń sáýirinde Qazaqstanda mopedter mehanıkalyq kólik quraldaryna teńestirildi. Endi olardy júrgizý úshin kólikti tirkeý, júrgizýshi kýáligin alý, memlekettik nómir ornatý jáne mindetti saqtandyrýdy rásimdeý qajet.
Buǵan deıin Almaty mańynda moped qaǵyp ketken zeınetker áıeldi júk kóligi basyp qala jazdaǵany habarlandy.