Tarazdaǵy ákimshilik quqyq buzýshylyqtar jónindegi mamandandyrylǵan sot lısenzıalaý normalary men esirtki aınalymy salasyndaǵy obektilerdiń tehnıkalyq nyǵaıtylýy talaptaryn buzǵan medısınalyq klınıkaǵa qatysty eki isti birdeı qarady, dep habarlaıdy infohub.kz saıty.
Jambyl oblysy sottarynyń resmı Telegram-arnasynda habarlanǵandaı, mekemege Ákimshilik quqyq buzýshylyq týraly kodekstiń 464-babynyń 1-bóligi jáne 427-babynyń 1-bóligi boıynsha buzýshylyqtar taǵylǵan. Tekserý barysynda klınıkada táýlik boıy kúzet, kúzet dabyly júıesi jáne esirtki saqtaýǵa arnalǵan úı-jaılardyń qajetti tehnıkalyq jabdyǵy joq ekeni anyqtaldy.
Medısınalyq uıymnyń kinási hattamalarmen, polısıa qyzmetkerleriniń baıandamalarymen jáne taraptardyń aıǵaqtarymen rastaldy. Klınıka ókili kinásin moıyndap, barlyq buzýshylyqtar tolyǵymen joıylǵanyn málimdedi. Ol mekemeniń qyzmetin toqtatpaýdy surady, óıtkeni bul pasıentterge táýlik boıy medısınalyq kómek kórsetýge teris áser etedi.
Sot jeńildetetin mán-jaılar retinde kináni moıyndaýdy, ókinýdi, buzýshylyqtardy tolyq joıýdy, sondaı-aq aýyrlatatyn mán-jaılardyń bolmaýyn eskerdi. Nátıjesinde klınıka eki bap boıynsha da kináli dep tanylyp, oǵan 346 myń jáne 216 myń teńge kóleminde aıyppul salyndy, bul jıyntyǵynda 562 myń teńgeni quraıdy. Sot qaýlylary áli zańdy kúshine engen joq.