Тараздағы мамандандырылған ауданаралық экономикалық сот 1,28 млрд теңгеден астам сомаға жасалған қаржылық лизинг шартын жарамсыз деп таныды. Тараптар мәміле бойынша алғанның бәрін бір-біріне қайтаруға міндеттелді, деп хабарлайды infohub.kz сайты.
Жамбыл облысы соттарының ресми Telegram-арнасында мәлім болғандай, сот акционерлік қоғамның екі жауапкершілігі шектеулі серіктестікке қарсы қаржылық лизинг шартын жарамсыз деп тану және тараптарды бастапқы қалпына келтіру туралы талап арызы бойынша азаматтық істі қарады.
Сот талқылауы барысында 2025 жылдың маусымында жауапкерлер арасында 1,28 млрд теңгеден астам сомаға қаржылық лизинг шарты жасалғаны анықталды. Мәміленің құны серіктестіктердің бірінің активтерінің баланстық құнының 91,7%-ын құраған, алайда мәмілені мақұлдау туралы қатысушылар жалпы жиналысының бірауыздан қабылданатын шешімі қабылданбаған.
Сонымен қатар сот мүдделер қақтығысын анықтады: бір серіктестіктің директоры бір мезгілде екінші серіктестіктің басшысы болған, ал соңғысының атынан шартқа оның жұбайы өзіне берілген сенімхат негізінде қол қойған.
Сот ұсынылған дәлелдерді бағалай келе, мәміле жасау кезінде заңнама талаптары мен серіктестік жарғысы бұзылған деген қорытындыға келді.
Сот шешімімен акционерлік қоғамның мәмілені жарамсыз деп тану және тараптарды бастапқы қалпына келтіру туралы талабы қанағаттандырылды. Тараптар мәміле бойынша алғанның бәрін бір-біріне қайтаруға міндетті. Шешім заңды күшіне енген жоқ.