Tarazda sot sheshimimen qajetti qujattarsyz salynǵan eki qabatty saýda úıi buzylatyn bolady. Jeke kásipker nysandy bir aı ishinde óz qarajaty esebinen demontajdaýǵa mindetti, dep habarlaıdy infohub.kz saıty.
Jambyl oblysynyń mamandandyrylǵan aýdanaralyq ekonomıkalyq soty memlekettik sáýlet-qurylys baqylaý basqarmasynyń jeke kásipkerge qatysty talap aryzy boıynsha azamattyq isti qarady. Talap qoıýǵa josparly tekserý barysynda anyqtalǵan buzýshylyqtar sebep boldy.
Saýda úıiniń qurylysy kásipkerge tıesili jer ýchaskesinde júrgizilgeni, alaıda sáýlet-josparlaý tapsyrmasy, qurylys-montaj jumystaryn bastaý týraly habarlama, joba-smeta qujattamasy jáne saraptamanyń oń qorytyndysy bolmaǵany anyqtaldy. Sonymen qatar, jumystar tehnıkalyq jáne avtorlyq qadaǵalaýsyz júrgizilgen.
Jaýapkerge berilgen nusqama belgilengen merzimde oryndalmaǵan, osyǵan baılanysty kásipker ákimshilik jaýapkershilikke tartyldy. Sot otyrysy barysynda nysannyń qoldanystaǵy qyzyl syzyq sheginde ornalasqany, al jaýapkerdiń qurylys kezinde onyń shekaralarynyń ózgergenin bile tura, kapıtaldyq qurylysty bastaǵany anyqtaldy.
Sot jeke kásipkerdi daýly saýda úıin bir aı ishinde óz qarajaty esebinen buzýǵa mindettedi. Sheshim zańdy kúshine endi.