Tarazda avtobýs jolaýshylarynyń arasyndaǵy janjal kóshede tóbeleske ulasty — oqıǵa kadrlary áleýmettik jelilerde tarady, al oblystyq polısıa bolǵan jaǵdaıǵa qatysty túsinikteme berdi, dep habarlaıdy infohub.kz saıty.
Oqıǵa ornynan túsirilgen beınejazba «Krımınalnyı Kazahstan» Telegram-arnasynda jarıalandy. Kadrlarda sporttyq kıim kıgen er adam jas jigitke qolymen jáne aıaǵymen soqqy beretini kórinedi. Tóbeleske áıel aralasyp, ony toqtatady.
Jarıalanymǵa sáıkes, janjalǵa qatysýshylardyń biriniń anasy bolǵan jaǵdaıdy bylaısha baıandady: bári avtobýsta bastalǵan. Onyń uly túsýge daıyndalyp, aldynda turǵan er adamnan túse me dep suraǵan. Áıeldiń aıtýynsha, avtobýsta uly janjaldy jalǵastyrmaǵan. Alaıda túskennen keıin er adam onyń sońynan erip, qýyp jetip, ura bastaǵan.
Beınejazbany avtobýstaǵy janjaldyń kýási bolǵan áıel túsirgen. Jas jigit oqıǵadan keıin travmatologıalyq pýnktke qaralǵany habarlanady.
NUR.KZ tilshisine Jambyl oblysy polısıa departamentiniń baspasóz qyzmeti bul fakti boıynsha Qylmystyq kodekstiń «Buzaqylyq» baby boıynsha sotqa deıingi tergeý bastalǵanyn aıtty.
«Qazirgi tańda bolǵan oqıǵanyń barlyq mán-jaıyn jan-jaqty, tolyq jáne obektıvti anyqtaý maqsatynda tergeý áreketteri júrgizilýde. Nátıjesi boıynsha tıisti prosestik sheshim qabyldanady», — dedi polısıada.
Nazar aýdaryńyz: vıdeoda ádepsiz sózder bar.