Denege sýret saldyrý áldeqashan jappaı trendke aınalǵanymen, bul prosedýranyń bıologıalyq saldary kóbine nazardan tys qalyp qoıady. Dárigerlerdiń eskertýinshe, tatýırovka alergıalyq reaksıalar men ınfeksıalar týdyryp qana qoımaı, emdik manıpýlásıalardy júrgizýdi de qıyndatady, dep habarlaıdy infohub.kz saıty.
Terige engen pıgmentter adamnyń ımýndyq júıesimen árekettesedi. Mamandar tatýırovka salý prosesiniń ózi teriniń joǵarǵy qabattaryn jaraqattaıtynyn, munyń densaýlyqqa tikeleı qaýip tóndirip, túrli asqynýlarǵa ákelýi múmkin ekenin atap ótedi.
Dárigerler eń kóp taralǵan qaýipterdiń qataryna pıgmentterge alergıalyq reaksıalardy, bakterıalyq ınfeksıalardy jáne sıa aınalasynda granýlómalardyń paıda bolýyn jatqyzady. Sonymen qatar sterıldenbegen qural-jabdyqty paıdalaný aýyr qaýip tóndiredi — ol arqyly V jáne S gepatıtteri sıaqty qaýipti ınfeksıalar juǵady. Qyzyl pıgment qalǵandaryna qaraǵanda alergıany jıi týdyrady, ári reaksıa sheberge barǵannan keıin jyldar ótken soń da bilinýi múmkin.
İri nemese jańa salynǵan tatýırovkalar da medısınalyq prosedýralardy júrgizýdi qıyndatady. Mysaly, plasıkalyq hırýrgter qabyný qaýpine baılanysty jańa sýret salynǵan aımaqtarda josparly ota jasaýdan bas tartady. Magnıtti-rezonanstyq tomografıa kezinde quramynda temir oksıdi bar sıa keıde kúıdirý sezimin týdyrady, al anestezıologtar epıdýraldi analgezıa kezinde tatýırovkalanǵan teriniń dál ortasynan ıneni salýdan qashady.