(A. S. Pýshkınnen)
Amal joq – qaıttim bildirmeı,
Iapyrmaý, qaıtip aıtamyn?
Qoımady dertiń kúıdirmeı,
Ne salsań da tartamyn.

Talaısyz, baqsyz men sorly,
Eriksiz attap uıattan,
Qorlyqqa kóndim bul qurly,
Baıqalar halim bul hattan.

Álimshe men de uıalyp,
Bildirmen dedim ólsem de.
Shydar em kúıip, men janyp,
Aıynda birer kórsem de.

Bolmady kórip qalýǵa,
Esitip biraz sózińdi.
Shydar em bir aı jatýǵa,
Uzaq tún jumbaı kózimdi.

Qyzyqtan qashyp bul jerge
Kóńilińiz sýyp kelipsiz.
Mánisin surap birerge,
Tildese almaımyn eriksiz.

Kelmeseń eger sen bizge,
Saý bolmas pa em, álbette?
Bolmasam ashyna men sizge,
Túspes em mundaı beınetke.

Asaý júrek qaınamaı,
Jýasyr ma edi kezinde?
Elden bir jaqsy saılamaı,
Barmas pa em erge ózim de?

Ózgege eshbir dúnıeden
Erkimen tımes bul júrek.
Ázelde taǵdyr ıeden,
Qojam – sensiń, ne kerek.

Tirshiligim – qurbandyq,
Shydamaı seni kórgenshe.
Táńirimnen kelgen bul jarlyq,
Iem – sensiń ólgenshe.

Áýelde kirdiń túsime,
Ortaqtasyp ómirime.
Tolǵaý salyp ishime,
Sol kúnde-aq jaqtyń kóńilime.

Qudaıdan bolǵaı dep emi,
Qudaıyny mol berdim.
Kórgen jerde-aq men seni,
"Osy eken ǵoı – sol" dedim.

Jatqan saıyn uıqyǵa,
Duǵa oqýshy em, shoshynyp.
Unatyp meni qulqyńa,
Júrýshi ediń qosylyp.

Túsimde meni jubantyp,
Jyly sózben sóılesip.
Ketýshi ediń qýantyp,
Qalýshy edi kóńil ósip.

Shynyńdy aıt, kimsiń terbetken,
Iembisiń saqtaýshy?
Álde azǵyryp áýre etken,
Jaýmysyń teýip taptaýshy?

Shesh kóńilimniń jumbaǵyn,
Álde bári – aldanys.
Jas júrek jaıyp saýsaǵyn,
Talpynǵan shyǵar aıǵa alys.

Ne bolsa da ózimdi
Tapsyrdym sizge nalynyp.
Toltyryp jasqa kózimdi,
Esirke deımin jalynyp.

Bul jerde eshkim syrymdy
Bilmeıdi, aıtyp ne eteıin?
Jaqtyrmaı buzsań nurymdy,
Bildirmeı kúıip óteıin.

Kútemin sizden qaıta hat,
Qýandyryp dertim jaz.
Ol bolmasa, shynyndy aıt,
Kiná ózimde, ózime az.

Óz hatyma óz kózim
Uıalyp, qorqyp baǵa almas.
Kepilim – seniń bir óziń,
Bóten jan nesip taba almas.

---