Taıaý Shyǵystaǵy shıelenis jalǵasýda: Amerıka Qurama Shtattary Irannyń ońtústigindegi nysandarǵa taǵy bir top soqqy berdi, al Tegeran buǵan jaýap retinde Parsy shyǵanaǵyndaǵy birneshe eldegi amerıkandyq áskerı bazalar men ınfraqurylymǵa shabýyl jasady, dep habarlaıdy infohub.kz.
AQSh Ortalyq qolbasshylyǵynyń (SENTKOM) dereginshe, soqqylar Bender-Abbas aýdanyndaǵy jáne eldiń ońtústigindegi basqa da strategıalyq nysandarǵa jasaldy. Nysanalar — Vashıngtonnyń málimdeýinshe, Iran Ormýz buǵazyndaǵy keme qatynasyna shabýyldarda qoldanatyn zymyran keshenderi, ushqyshsyz ushý apparattary, áýe shabýylyna qarsy qorǵanys jáne jaǵalaý qorǵanysy quraldarymen baılanysty obektiler.
Jaýap retinde Iran Kýveıt, Katar jáne Bahreındegi amerıkandyq nysandarǵa, sondaı-aq Omandaǵy radıolokasıalyq stansıaǵa zymyrandyq jáne ushqyshsyz ushý apparattarymen soqqy bergenin málimdedi. Sonymen qatar, ırandyq BAQ Sırıadaǵy burynǵy amerıkandyq bazaǵa soqqylar jasalǵanyn habarlady. Bul málimdemelerdi halyqaralyq agenttikterdiń habarlary ishinara rastaıdy, alaıda AQSh ázirge yqtımal zalal kólemin ashqan joq.
«Reıter» agenttiginiń dereginshe, Kýveıtte soqqydan keıin elektr stansıasy men sý tushshytý nysanynda órt shyǵyp, elektrmen jabdyqtaýda úzilister boldy. Katarda bılik áýe shabýylyna qarsy qorǵanys quraldary ırandyq zymyrandy ustap qalǵanyn, alaıda qulaǵan synyqtardan bala jaraqat alǵanyn habarlady.
Shıelenis Ormýz buǵazy aýdanynda da jalǵasýda — bul munaı men gaz eksportynyń mańyzdy álemdik marshrýttarynyń biri. «Reıter» Irannyń buǵaz mańynda Taıland týy astyndaǵy kemege shabýyl jasaǵanyn habarlaıdy. Sonymen qatar, qarýly adamdar Iemen jaǵalaýynda taǵy bir kemeni basyp aldy, biraq olardyń tıesiligi resmı túrde anyqtalmady.
Bul rette Irannyń amerıkandyq áskerı kemeni dáldep soqqany týraly rastaýlar ázirge joq. Buǵan deıin Tegeran Úndi muhıtynyń soltústik bóliginde amerıkandyq kemege shabýyl jasalǵanyn málimdegen edi, alaıda AQSh bul aqparatty rastamady.
Jańa soqqylar aıasynda Ormýz buǵazyndaǵy jaǵdaı shıelenisti kúıinde qalýda. «Reıter» dereginshe, osy marshrýt arqyly komersıalyq kemelerdiń qozǵalysy aıtarlyqtaı qysqardy, al munaı jetkizilimindegi yqtımal úzilisterge qatysty alańdaýshylyq álemdik shıkizat baǵasyn qaıta kóterdi.