26 shilde kúni tańerteń «Noýl» taıfýny Qytaıdyń ońtústik jaǵalaýyna soqty. Ol Gýandýn provınsıasy men kórshiles Gonkongta qatty nóser men daýyldy jel týdyrdy. Aýa raıynyń qolaısyzdyǵyna baılanysty Gonkong halyqaralyq áýejaıynda reıster toqtatyldy, dep habarlaıdy infohub.kz.
Reuters agenttiginiń habarlaýynsha, tabıǵı apat Gýandýn provınsıasynyń 340 myńnan astam turǵynyn evakýasıalaýǵa májbúr etti. «Noýl» bıylǵy jyly 12-shi tropıktik sıklon bolyp, shilde aıynda Qytaıǵa jetken úshinshi daýyl boldy.
Gonkong bıligi aldymen daýyldy eskertý deńgeıin №9 belgisine deıin kóterdi. Ol kezde taıfýn qaladan shamamen 80 shaqyrym qashyqtyqta edi. Keıin eskertý deńgeıi №8-ge túsirildi. Bul deńgeı kásiporyndardyń kópshiligin jabý jáne qoǵamdyq kólik jumysyna eleýli shekteýler qoıýdy kózdeıdi.
Gonkong observatorıasynyń málimetinshe, taıfýn materık ishine jyljýymen birtindep álsireıdi, biraq kúshti jel men nóserli jańbyr áli de saqtalýda. «Sońǵy bir saǵatta 30 mm-den astam jaýyn-shashyn tústi jáne qarqyndy jańbyrlardyń jalǵasatyny kútilýde», — dedi sınoptıkter, turǵyndardy kenetten bolatyn sý tasqyny qaýpi týraly eskertip.
Gonkong áýejaıy ákimshiligi reısterdiń jergilikti ýaqyt boıynsha saǵat 18:00-den keıin qaıta bastalatynyn habarlady.
Buǵan deıin redaksıa Eýropadaǵy ekstremaldy ystyqtan bolǵan orman órtteri týraly habarlaǵan bolatyn. Ispanıada Madrıd mańyndaǵy eldi mekenderden 19 myńǵa jýyq adam evakýasıalandy. El úkimeti tótenshe jaǵdaı jarıalady. Fransıanyń ońtústiginde 60 myńnan astam turǵyn ottan qashyp, úılerin tastap ketti.