Taıǵa mindik,
Toıǵa shaptyq,
Jaqsy kıim kıinip.
Úki taqtyq,
Kúlki baqtyq,
Joq nemege súıinip.
Kúıkentaı kútti,
Qus etti,
Ne bitti?

Atamyz bar,
Moldamyz bar,
Aıtqanyna kónbedik.
Art jaǵynda,
Biz soǵan zar,
Bolamyz dep bilmedik.
Urlanyp qashtyq,
Jolǵastyq,
Shýlastyq.

Jazý jazdyq,
Hat tanydyq,
Boldyq azat moldadan.
Shala oqýdan,
Ne jarydyq,
Qalǵannan soń qur nadan?
Baǵasyz jastyq —
Bozbastyq,
Adastyq.

Bozbalalyq —
Qyz qaradyq,
Qaljyń, ázil sóılestik.
At jarattyq,
Sán tarattyq,
Áýeıilik kúılestik.
Kóńilge keler,
Kim jolar,
Kim kóner?

Qaıyn bardyq,
Qatyn aldyq,
Enshi tıdi azǵana.
Sharýa atandyq,
Endi oılandyq,
Qala berdi bozbala.
Burynǵy qaıda?
Oıbaıla —
Ne paıda?

---