Jaqynda Almatydaǵy Kardıologıa jáne ishki aýrýlar ǵylymı-zertteý ınstıtýtynda júrekti toqtatpaı, keýde qýysyn ashpaı jasalatyn birqatar az ınvazıaly otalar júrgizildi. Aýyr mıtraldy regýrgıtasıasy bar pasıentterge TEER (transkateterli mıtraldy klapan plasıkasy, «sheti-shetine» tehnologıasy) ádisimen em jasaldy… dep habarlady infohub.kz saıty.
Sheti-shetine (TEER) tehnologıasy boıynsha transkateterli mıtraldy klapan plasıkasyna arnalǵan halyqaralyq praktıkalyq sheberlik synyby qazaqstandyq kardıologtar men Qytaı mamandaryn biriktirdi. Birlesken otalarǵa Shandýn ýnıversıtetiniń Sılý aýrýhanasy ehokardıografıa departamentiniń dırektory, profesor Lú Ian, qurylymdyq aralasýlarǵa ıntraoperasıalyq ehokardıografıalyq súıemeldeý boıynsha halyqaralyq sarapshy, profesor An Gýıpen jáne maman Chjan Chao qatysty.
Qazaqstan tarapynan joǵary tehnologıaly aralasýlardy ǴZI-dyń rentgenendovaskýlárlyq operasıalyq bóliminiń meńgerýshisi Alekseı Kolesnıkov basqarǵan mýltıdısıplınarly top oryndady. Operasıalyq top quramyna ıntervensıalyq kardıologtar Almat Qaljanov, Nurjan Temenov, Arystan Kýjýkeev jáne Marjan İlıasqyzy kirdi.
Densaýlyq saqtaý mınıstrliginiń málimetinshe, aldymen dárigerler pasıentterdi klınıkalyq taldaýdan ótkizip, naýqastardy irikteýdiń zamanaýı tásilderi men TEER prosedýrasyn oryndaý erekshelikterin talqylady. «Barlyq ota mıtraldy klapan qaqpaqshalaryn táýelsiz ustap, mıtraldy regýrgıtasıany tıimdi joıýǵa múmkindik beretin zamanaýı DragonFly júıesin qoldaný arqyly oryndaldy», — delingen habarlamada.
Óńesh arqyly ehokardıografıalyq baqylaýdyń arqasynda DragonFly júıesiniń dál ornalasýy, nátıjeni obektıvti baǵalaý jáne barlyq kezeńderde pasıentterdiń qaýipsizdigi qamtamasyz etildi. Barlyq ota sátti ótti.
ǴZI mamandary kardıohırýrgıadaǵy jańa tehnologıany meńgerý aýyr mıtraldy regýrgıtasıasy bar pasıentterge joǵary tehnologıaly medısınalyq kómek kórsetý múmkindikterin keńeıtip, olardyń ómir súrý sapasyn arttyrýǵa múmkindik beretinin atap ótti.