Елімізде жыл сайын 3 миллионнан астам қазақстандық мемлекеттен тегін дәрі-дәрмек алады. Жеті жыл ішінде осы мақсатқа бөлінген бюджет үш есеге ұлғайып, 83 млрд теңгеден 272,9 млрд теңгеге жетті (2019–2025 жылдар аралығында), ал жалпы шығын көлемі 1,3 трлн теңгеге жетті, деп хабарлайды infohub.kz сайты.
Денсаулық сақтау министрлігінің мәліметінше, биыл дәрі-дәрмек пен медициналық бұйымдарды сатып алу жоспары 584,1 млрд теңге көлемінде бекітілді. Бұл 2025 жылмен салыстырғанда 9,6%-ға артық.
Ведомство сондай-ақ мемлекеттің 10,3 млрд теңге бюджет қаражатын айтарлықтай үнемдегенін атап өтті. Себебі жүйені жетілдіру аясында 66 отандық препараттың бағасы төмендетілді.
Делдалдарға артық төлем жасамас үшін Денсаулық сақтау министрлігі дәрі-дәрмекті қазақстандық және шетелдік зауыттардан тікелей сатып алуды жиілетті. Өткен жылы мұндай тікелей келісімшарттар бойынша 182 атау сатып алынса, биыл — 404. Сонымен қатар Қазақстан препараттардың бір бөлігін халықаралық ұйымдар (ЮНИСЕФ және БҰҰДБ) арқылы сатып алады. Биыл олар арқылы 32 түрлі дәрі-дәрмек алынады (өткен жылы 23 еді).
Денсаулық сақтау министрлігінде осындай тәсіл негізгі мәселелерді шешеді деп сенеді. Яғни бюджет қаражаты үнемделіп, қоймалардағы препарат тапшылығы жойылады, ал пациенттер өз дәрілерін уақытында ала алады.
Бұған дейін «Курсив» тегін дәрі-дәрмек алатын қазақстандықтар енді оның қолжетімділігін мессенджерлер арқылы бақылай алатынын жазған болатын. «СК-Фармация» компаниясы Telegram және WhatsApp сервистерін іске қосты. Қажетті препараттың келіп түскенін рецепт нөмірі немесе ЖСН арқылы білуге болады.