Jańa oqý jyly qarsańynda Qazaqstanda ata-analardy memlekettik qoldaý sharalaryna qatysty adastyrýy múmkin aqparat taralýda. Ortalyq komýnıkasıalar qyzmeti janyndaǵy Dezinformasıaǵa qarsy kúres ortalyǵy tegin tamaq pen materıaldyq kómek — bul ártúrli sharalar ekenin jáne olar barlyq oqýshylarǵa berilmeıtinin túsindirdi, dep habarlaıdy infohub.kz saıty.
Dezinformasıaǵa qarsy kúres ortalyǵynyń Telegram-arnasynda oqý jyly qarsańynda Qazaqstanda tegin mektep tamaǵy men balany mektepke daıyndaýǵa arnalǵan materıaldyq kómek birdeı memlekettik qoldaý sharasy jáne barlyq oqýshylarǵa tıesili degen qate túsinik týdyratyn aqparat taralyp jatqany atap ótildi.
«Bul málimdeme qoldanystaǵy zańnamaǵa sáıkes kelmeıdi. Bul — ártúrli maqsattary, berilý sharttary men alýshylar sheńberi bar eki derbes memlekettik qoldaý sharasy», — dep túsindirdi ortalyqta.
«Bilim týraly» zańnyń 6-babyna sáıkes, jergilikti atqarýshy organdar bilim alýshylar men tárbıelenýshilerge qarjylyq jáne materıaldyq kómek kórsetýdi qamtamasyz etedi. Mundaı kómekti berý tártibi QR Úkimetiniń 2008 jylǵy 25 qańtardaǵy qaýlysymen belgilengen.
«Kómek, atap aıtqanda, ataýly áleýmettik kómek alýǵa quqyǵy bar otbasylardyń balalaryna, jan basyna shaqqandaǵy ortasha tabysy eń tómengi kúnkóris deńgeıinen tómen otbasylarǵa, jetim balalarǵa jáne ata-anasynyń qamqorlyǵynsyz qalǵan balalarǵa, sondaı-aq zańnamada kózdelgen ózge de sanattarǵa beriledi», — delingen habarlamada.
Memlekettik orta bilim berý uıymdarynda 1-4 synyp oqýshylarynyń barlyǵy áleýmettik mártebesine qaramastan tegin ystyq tamaqpen qamtamasyz etiletini, sondaı-aq 5-11 synyp oqýshylarynyń jekelegen áleýmettik osal sanattaryna jatatyndary da qamtylatyny atap ótildi.
«Óz kezeginde, kıim, aıaq kıim jáne mektep-jazý quraldaryn satyp alýǵa arnalǵan materıaldyq kómek ataýly sıpatqa ıe jáne zańnamada kózdelgen tıisti negizderi bar muqtaj balalar men otbasylarǵa beriledi», — dep qosty ortalyqta.
Osylaısha, ortalyqtyń aqparaty boıynsha, jekelegen sanattaǵy oqýshylarǵa ataýly kómekti barlyq oqýshylarǵa tıesili tólem retinde usyný ata-analarda negizsiz úmit týdyryp, memlekettik áleýmettik saıasattyń mazmunyn burmalaıdy.