Amerıkandyq ánshi Teılor Svıft Rod-Aılend shtatynyń turǵynyna 50 myń dollar (shamamen 23,3 mıllıon teńge) aýdardy. Bul qarajat jol apatynan keıin jasóspirimderdi qutqarý kezinde aýyr jaraqat alǵan áıelge arnalǵan, dep habarlaıdy infohub.kz saıty.
Oqıǵa 18 shildede Hopkınton qalasyndaǵy I-95 tas jolynda qatty jańbyr kezinde bolǵan. Eshlı Taýnton jasóspirimder otyrǵan kóliktiń basqarýdan shyǵyp, joldan aýyp ketkenin kórgen. Ol dereý toqtap, zardap shekkenderge kómekke umtyldy.
Ol jasóspirimderge kólikten shyǵýǵa kómektesip jatqanda, taǵy bir kólik basqarýdan shyǵyp, tike olardyń qaraı bettegen. Eshlıdiń kúıeýiniń aıtýynsha, ol sońǵy sátte jasóspirimderdiń birin joldan ıterip jiberip, soqqyny óz moınyna alǵan.
Nátıjesinde Taýnton aıaǵynan aýyr jaraqat alyp, ishki aǵzalary zaqymdanǵan. Onyń jińishke jáne toq ishekteri zardap shekken, baýyry men kóketi jarylǵan, sonyń saldarynan bir ókpesi jabylyp qalǵan. Áıelge keminde úsh operasıa jasaý qajet bolǵan.
Osy ýaqyt boıy Eshlı áleýmettik jelilerde qalpyna kelý prosesi týraly bólisip otyrǵan. Ol aýrýhanadaǵy, dárilik komada jatqan sátterin sýretke túsirip, keıin aıaǵyna fıksator taǵyp úıge oralǵanyn kórsetken.
Svıfttiń qaıyrymdylyǵy týraly Eshlı juma kúni bilip, mundaı kómek kútpegenin aıtqan. Ol áleýmettik jelilerde ánshiniń bul áreketin keremet dep atap, qoldaýy úshin alǵys bildirgen.
50 myń dollar kólemindegi qaıyrymdylyq qarajaty óz ómirin qaterge tigip, basqalardy qaýipti jaǵdaıdan qutqarǵan áıeldiń emdelý shyǵyndaryn jabýǵa jumsalady.
Buǵan deıin Kursiv LifeStyle Teılor Svıft pen Trevıs Kelsıdiń myń qonaq qatysatyn toı ótkizýdi josparlap otyrǵanyn habarlaǵan.