Almatydaǵy Kane Ýesttiń jankúıerlerine juldyzdy Ortalyq stadıon sahnasynda kórýge daıyndalyp jatqandarǵa bıletterdi aldyn ala júktep alý usynyldy, dep habarlaıdy infohub.kz saıty.
Uıymdastyrýshylar jergilikti bılikpen kelise otyryp, konsert ótkizý kezinde qoldanylatyn jáne sol jıilik dıapazonyn paıdalanatyn arnaıy tehnıkalyq jabdyqtyń durys jumys isteýi úshin osy aýdanda Tele2/Altel baılanysyn ýaqytsha shekteýdi surady.
Anyqtalǵandaı, uqsas tehnıkalyq talaptar basqa elderde, onyń ishinde Grýzıa men Túrkıada is-sharalar ótkizý kezinde qoldanylǵan.
Tele2/Altel uıymdastyrýshylar men ákimdik ótinishine qoldaý bildirip, konsert ótkizý úshin qajetti tehnıkalyq kómek kórsetti.
«Sonymen qatar, Tele2/Altel is-shara ótetin aýmaqta klıentter úshin uıaly baılanys pen ınternettiń qoljetimdiligin saqtaý úshin barlyq qoljetimdi tehnıkalyq múmkindikterdi paıdalanady. Degenmen, uıymdastyrýshylardyń tehnıkalyq talaptaryn oryndaý úshin qajetti jıilikterdiń bir bóligin ýaqytsha shekteý, jelige kútiletin joǵary júktememen birge, jekelegen kezeńderde mobıldi ınternet jyldamdyǵyna áser etýi múmkin.
Konsertke barý barynsha yńǵaıly ótýi úshin Ortalyq stadıonǵa kelgenge deıin telefonǵa bıletterdi, QR-kodtardy jáne is-sharaǵa kirý úshin qajetti basqa aqparatty aldyn ala júktep alýdy usynamyz», — delingen qalalyq bılik habarlamasynda.
Buǵan deıin «Kýrsıv» qalada kórermenderdiń qaýipsizdigi men jaıly qozǵalysyn qamtamasyz etý úshin jol qozǵalysyn jáne qoǵamdyq kólik jumysyn uıymdastyrý boıynsha qosymsha sharalar qabyldanatynyn jazǵan.