Temirtaý mańyndaǵy eldi mekenderdiń birinde polısıa qyzmetkerleri 125 túp esirtki ósimdigi ósirilgen jylyjaıdy anyqtady. Olardy ósirýge kúdikti retinde 19 jastaǵy jergilikti turǵyn ustaldy, dep habarlaıdy infohub.kz.
Temirtaýǵa jaqyn ornalasqan eldi mekenderdiń birinde polıseıler arnaıy jabdyqtalǵan jylyjaıdy anyqtady, onda esirtki quramdy ósimdikter ósirilgen. İs-shara respýblıkalyq «Qarasora-2026» jedel-profılaktıkalyq is-sharasy barysynda ótkizildi.
Kúdikti 19 jastaǵy jergilikti turǵyn bolyp shyqty. Ony Temirtaý qalalyq polısıa basqarmasynyń esirtki qylmysyna qarsy kúres bóliminiń qyzmetkerleri Qaraǵandy oblysy jáne Ulytaý oblysy boıynsha qylmystyq-atqarý júıesi departamentimen birlesip ustady.
«Jeke úıdiń aýmaǵyn tekserý kezinde, qosalqy jer ýchaskesinde jáne arnaıy jabdyqtalǵan jylyjaıda polıseıler 125 túp kenep tuqymdas esirtki ósimdikterin tapty. Tintý barysynda sharýashylyq ǵımarattarynyń birinen keptirilgen ósimdik tektes esirtki zattary jáne tirkelmegen ańshy myltyǵy alyndy. Aldyn ala málimetter boıynsha, kúdikti kenepti arnaıy jasalǵan jaǵdaılardy paıdalana otyryp, óz betinshe ósirgen», – dedi Qaraǵandy oblysy polısıa departamenti bastyǵynyń birinshi orynbasary Qýanysh Orynbetov.
Ósirýge tyıym salynǵan esirtki quramdy ósimdikterdi zańsyz ósirý faktisi boıynsha Qylmystyq kodekstiń 300-baby 1-bóligimen sotqa deıingi tergeý bastaldy.
Polısıa mundaı ósimdikterdi zańsyz ósirý qylmystyq jaýapkershilikke ákep soǵatynyn eske saldy. Esirtkiniń zańsyz aınalymyna baılanysty qylmystardy anyqtaý jumysy «Qarasora-2026» jedel-profılaktıkalyq is-sharasy aıasynda jalǵasatyn bolady.